CSK కు షాక్.. టోర్నీ నుంచి స్టార్ ఓపెనర్ ఔట్

CSK: ఐపీఎల్ 2024 ప్రారంభానికి ముందు డిఫెండింగ్ ఛాంపియన్ చెన్నై సూపర్ కింగ్స్‌కు గట్టి షాక్ తగిలింది. ఆ జట్టు స్టార్ ఓపెనర్ డెవాన్ కాన్వే.. గాయంతో ఈ సీజన్‌లో సగానికి పైగా మ్యాచులకు దూరమయ్యాడు. బొటన వేలికి గాయానికి త్వరలో సర్జరీ చేయించుకోనున్న ఈ ఓపెనర్.. సుమారు 8 వారాల పాటు క్రికెట్‌కు దూరం కానున్నట్లు తెలుస్తోంది. అదే జరిగితే రుతురాజ్ గైక్వాడ్‌తో కలిసి రచిన్ రవీంద్ర సీఎస్కే బ్యాటింగ్‌ను ప్రారంభించాల్సి ఉంటుంది.

ఇండియన్ ప్రీమియర్ లీగ్ 2024 మరి కొన్ని రోజుల్లో తెరలేవనుంది. ఇప్పటికే జట్లు సన్నాహకాలు ప్రారంభించాయి. మార్చి 22న చెన్నై సూపర్ కింగ్స్, రాయల్ ఛాలెంజర్స్ బెంగళూరు జట్ల మధ్య జరిగే మ్యాచుతో సీజన్ షురూ కానుంది. అయితే ఫస్టు మ్యాచుకు ముందే డిఫెండింగ్ ఛాంపియన్ చెన్నై సూపర్ కింగ్స్‌కు ఎదురుదెబ్బ తగిలింది. ఆ జట్టు స్టార్ ఓపెనర్, గతేడాది ఫైనల్‌లో ప్లేయర్ ఆఫ్ ది మ్యాచుగా నిలిచిన డెవాన్ కాన్వే గాయం కారణంగా ఈ సీజన్‌లో చాలా మ్యాచులకు దూరం కానున్నట్లు తెలుస్తోంది.

ఇటీవల ఆస్ట్రేలియాతో జరిగిన టెస్టు సిరీస్‌లో డెవాన్ కాన్వే ఎడమచేతి బొటన వేలికి గాయమైంది. అప్పటి నుంచి అతడు మళ్లీ మైదానంలో కనిపించలేదు. తొలి టెస్టు మ్యాచుకు సైతం దూరమయ్యాడు. తాజాగా స్కానింగ్‌లో గాయం తీవ్రత ఎక్కువగా ఉన్నట్లు తెలుస్తోంది. దీంతో అతడికి సర్జరీ అవసరమని వైద్యులు సూచించారు. ఫలితంగా ఆస్ట్రేలియా టెస్టు సిరీస్ మొత్తానికి ఈ లెఫ్ట్ హ్యాండర్ దూరమయ్యాడు.

మరికొన్ని రోజుల్లో కాన్వే సర్జరీ చేయించుకోనున్నట్లు తెలుస్తోంది. శస్త్రచికిత్స తర్వాత కనీసం 8 వారాల పాటు అతడు మైదానానికి దూరంగా ఉండనున్నాడు. ఈ పరిస్థితుల్లో మార్చి, ఏప్రిల్‌లో జరిగే ఐపీఎల్ మ్యాచులకు అతడు దూరం కానున్నట్లు తెలుస్తోంది. అనుకున్నట్లుగా కోలుకుంటే కాన్వే.. మేలో తిరిగి జట్టులో చేరే అవకాశం ఉంది. అయితే అప్పటికే సీజన్‌లో సగానికి పైగా మ్యాచులు పూర్తవుతాయి. ఐపీఎల్ పూర్తయిన వెంటనే టీ20 ప్రపంచకప్ జరగనుంది. ఈ పరిస్థితుల్లో పూర్తిగా కోలుకున్న తర్వాతే అతడిని కివీస్ జట్టు మైదానంలోకి దించే అవకాశం ఉంది. దీంతో ఐపీఎల్ 17వ సీజన్ మొత్తానికి కాన్వే దూరం కానున్నాడా అనే ప్రశ్నలు తెలత్తుతున్నాయి. (CSK)

కాగా ఇండియన్ ప్రీమియర్ లీగ్‌లో చెన్నై సూపర్ కింగ్స్ విజయాల్లో డెవాన్ కాన్వేది కీలకపాత్ర. కీలక సమయాల్లో రాణించే ఈ ప్లేయర్.. జట్టుకు ఎన్నో విజయాలను అందించాడు. కాన్వే స్థానంలో చెన్నై సూపర్ కింగ్స్.. రచిన్ రవీంద్రను ఓపెనర్‌గా పంపే అవకాశాలు ఉన్నాయి. ఇటీవల జరిగిన మినీ వేలంలో ఈ ఆటగాడిని సీఎస్కే రూ.1.80 కోట్లకు దక్కించుకుంది. ఎలాగూ ఓపెనర్‌గా రుతురాజ్ గైక్వాడ్ ఉంటాడు కాబట్టి.. రచిన్ రవీంద్ర మరో ఓపెనర్‌గా ఉంటే.. రైట్, లెఫ్ట్ కాంబినేషన్‌ కూడా సెట్ అవుతుందని ఆ జట్టు భావిస్తోంది.

ఇక ఈ ఏడాది భారత్‌లో సార్వత్రిక ఎన్నికలు జరగనున్న నేపథ్యంలో ఐపీఎల్ 2024లోని తొలి 21 మ్యాచులకు సంబంధించిన షెడ్యూల్‌ను నిర్వహకులు ప్రకటించారు. మార్చి 22 నుంచి ఏప్రిల్ 7 వరకు ఈ మ్యాచులు జరగనున్నాయి. ఎన్నికల షెడ్యూల్ విడుదలయ్యాక.. ఐపీఎల్‌లోని మిగతా మ్యాచులకు సంబంధించిన షెడ్యూల్ ప్రకటన రానుంది.