Dasara: శిష్యుడి టేకింగ్‌కి సుకుమార్ ఫిదా!
ప్రస్తుతం బాక్సాఫీస్ వద్ద దుమ్ములేపుతున్న టాలీవుడ్ సినిమా దసరా. నేచురల్ స్టార్ నాని, కీర్తి సురేష్ జంటగా నటించిన ఈ సినిమా మార్చి 30న విడుదలై బ్లాక్బస్టర్ హిట్గా నిలిచింది. ఈ సినిమాను క్రియేటివ్ డైరెక్టర్ సుకుమార్ శిష్యుడైన శ్రీకాంత్ ఓదెల అనే కొత్త డైరెక్టర్ తెరకెక్కించాడు. తెలంగాణ నేపథ్యంలో తీసిన ఈ సినిమాను పూర్తి రా అండ్ రస్టిక్గా రూపొందించి తొలి ప్రయత్నంలోనే ఘన విజయాన్ని సాధించాడు. ఇక ఈ సినిమాను అభిమానులు, ప్రేక్షకులే కాకుండా టాలీవుడ్ స్టార్స్, స్టార్ డైరెక్టర్స్ కూడా మెచ్చుకుంటున్నారు. ఈ సినిమా చూసిన సూపర్ స్టార్ మహేష్ బాబు, పాన్ ఇండియా స్టార్ ప్రభాస్ సోషల్ మీడియా వేదికగా నానిపై ప్రశంసల వర్షం కురిపించారు. తాజాగా ఈ సినిమాపై దర్శకధీరుడు ఎస్ఎస్ రాజమౌళి, డైరెక్టర్ సుకుమార్ కూడా తమ అభిప్రాయాన్ని పంచుకున్నారు.
ఇటీవల స్టార్ డైరెక్టర్ ఎస్ఎస్.రాజమౌళి దసరా సినిమాపై సూపర్ కామెంట్స్ చేశారు. ‘దసరా సినిమా ప్రేక్షకులను ఆకట్టుకోవడం సంతోషంగా ఉంది. నాని కెరీర్ లోనే అద్భుతమైన అభినయాన్ని ప్రదర్శించాడు. కీర్తి సురేశ్ తన పాత్రను సునాయాసంగా పోషించింది. సినిమాటోగ్రఫీ అద్భుతంగా ఉంది. బ్యాక్ గ్రౌండ్ మ్యూజిక్ గురించి ప్రత్యేకంగా చెప్పుకోవాలి. బొగ్గు గనుల వాతావరణం, కఠినమైన పాత్రల మధ్య డైరెక్టర్ శ్రీకాంత్ ఓదెల ప్రేమ కథను అద్భుతంగా ఆవిష్కరించారు’అంటూ చిత్ర యూనిపై ప్రశంసల వర్షం కురింపించారు. ఇక తాజాగా శ్రీకాంత్ ఓదెల గురువు అయిన సుకుమార్ దసరా మూవీపై తన అభిప్రాయాన్ని వెల్లడించాడు. దసరా సినిమాను చూసి సంతోషంతో పాటు గర్వంగా ఫీల్ అవుతున్నానని అన్నారు సుకుమార్. విజువల నెరేషన్‌తో తనను వీర్లపల్లిలోకి తీసుకెళ్లిన విధానానికి తాను మంత్రముగ్ధుడనయ్యానంటూ శ్రీకాంత్ క్రియేటివిటీని పొగిడారు లెక్కల మాస్టారు సుకుమార్.
అంతేకాదు, ధరణి పాత్రకు నాని తనను తాను సరెండర్ చేసుకున్న తీరు.. నాని ప్రతిసారి అతడి ప్రతిభతో తనను సర్‌ప్రైజ్ చేస్తాడని.. వెన్నెల పాత్రలో కీర్తి సురేష్ మెరిసిన తీరు.. సూరి పాత్రలో దీక్షిత్ శెట్టి అదరగొట్టాడంటూ సుకుమార్ చెప్పుకొచ్చాడు. ఇక ఈ సినిమా ఇంత బాగా రావడానికి కృషి చేసిన ప్రతి టెక్నీషియన్‌కు తన అభినందనలు తెలిపారు. సుకుమార్ తన శిష్యుడిపై చేసిన వ్యాఖ్యలు సోషల్ మీడియాలో వైరల్ అయ్యాయి.
