Nithin బర్త్డే స్పెషల్.. బ్లాక్బస్టర్ మూవీ రీరిలీజ్!
ప్రస్తుతం టాలీవుడ్లో రీరిలిజ్ ట్రెండ్ కొనసాగుతోంది. వారం వారం కొత్త సినిమాలతోపాటు స్టార్ హీరోల సూపర్ హిట్ సినిమాలు రీరిలీజ్ అవుతూ మంచి కలెక్షన్లు రాబడుతున్నాయి. ఇప్పటికే మహేష్ నటించిన పోకిరి, రామ్ చరణ్ ఆరెంజ్, పవర్ స్టార్ సినిమాలైన జల్సా, ఖుషి రీరిలీజ్ అయ్యి మరోసారి ప్రేక్షకులను అలరించాయి. ఈ రీ రిలీజ్ ట్రెండ్‌లోకి యంగ్ హీరో నితిన్ సినిమా చేరబోతోంది. నితిన్, నిత్యామీన‌న్ జంట‌గా నటించిన మొదటి సినిమా ఇష్క్. వీరిద్దరి కాంబినేషన్లో వచ్చిన ఈ సినిమా అప్పుడు బ్లాక్బస్టర్ హిట్ అందుకుని నితిన్ కెరీర్కి చాలా ప్లస్ అయ్యింది. అందుకే నితిన్ పుట్టిన రోజు సందర్భంగా ఈ సినిమాను మార్చి 29న రీ రిలీజ్ చేయనున్నారు మేకర్స్. రొమాంటిక్ ల‌వ్‌స్టోరీగా 2012లో రిలీజైన ఈ సినిమాకు విక్ర‌మ్ కే కుమార్ ద‌ర్శ‌క‌త్వం వ‌హించారు.
వ‌రుస ప‌రాజ‌యాల‌తో స‌త‌మ‌త‌మ‌వుతోన్న నితిన్ ఈ సినిమాతోనే తిరిగి విజ‌యాల బాట ప‌ట్టారు. నితిన్ కెరీర్‌లోనే బిగ్గెస్ట్ హిట్గా ఈ సినిమా నిలిచింది. క‌మ‌ర్షియ‌ల్ స‌క్సెస్‌గానే కాకుండా రెండు నంది అవార్డుల‌ను కూడా ఇష్క్ సొంతం చేసుకుంది. అనూప్ రూబెన్స్ కంపోజ్ చేసిన పాట‌లు మ్యూజిక్ ల‌వ‌ర్స్‌ను ఆక‌ట్టుకుని చాలాకాలంపాటు మారుమోగాయి. ఆ తర్వాత నితిన్, నిత్యా మీనన్ కాంబినేషన్లో వచ్చిన గుండె జారి గల్లంతయ్యిందే సినిమా కూడా సూపర్ హిట్గా నిలిచిన విషయం తెలిసిందే.
కాగా, నితిన్ నటించిన మాచర్ల నియోజకవర్గం భారీ అంచనాల మధ్య విడుదలై నెగెటివ్ టాక్ని సొంతం చేసుకుంది. ప్రస్తుతం నితిన్ వ‌క్కంతం వంశీ సినిమాలో న‌టిస్తూ బిజీగా ఉన్నాడు. ఈ సినిమాతో పాటు ఇటీవలే వెంకీ కుడుముల డైరెక్ష‌న్‌లో ఓ సినిమాకు గ్రీన్ సిగ్న‌ల్ ఇచ్చాడు. రష్మికా మందన్నా హీరోయిన్గా నటిస్తున్న ఈ సినిమా షూటింగ్ ఇటీవలే ప్రారంభమైంది. మెగాస్టార్ చిరంజీవి మొదటి షాట్కి క్లాప్ కొట్టి షూటింగ్ ప్రారంభించారు. వెంకి కుడుముల దర్శకత్వంలో నితిన్, రష్మిక హీరోహీరోయిన్లుగా వచ్చిన భీష్మ మంచి విజయం సాధించి ప్రేక్షకులను ఆకట్టుకుంది. మరోసారి ఈ ముగ్గురి కాంబినేషన్లో రూపొందుతున్న సినిమా ఎలా ఉండబోతోందో చూడాలి మరి.
