NTR పిల్లలకు స్పెషల్ గిఫ్ట్స్ పంపిన స్టార్ హీరోయిన్
దర్శకధీరుడు ఎస్ఎస్ రాజమౌళి దర్శకత్వంలో రూపొందిన ఆర్ఆర్ఆర్ సినిమాతో బాలీవుడ్ భామ ఆలియా భట్ టాలీవుడ్ ఎంట్రీ ఇచ్చిన సంగతి తెలిసిందే. విజువల్ వండర్గా విడుదలైన ఈ పీరియాడిక్ డ్రామా కలెక్షన్లు, అవార్డుల పరంగా పాన్ఇండియా లెవల్లో రికార్డులు క్రియేట్ చేసింది. తాజాగా ఆస్కార్ కైవసం చేసుకుని తెలుగు ఖ్యాతిని ప్రపంచవ్యాప్తం చేసింది. ఈ సినిమాలో రామ్, భీమ్గా అలరించిన మెగా పవర్స్టార్ రామ్ చరణ్, యంగ్ టైగర్ ఎన్టీఆర్ పాన్ఇండియా స్టార్లుగా క్రేజ్ సాధాంచారు. కాగా ఈ సినిమా విడుదలై మార్చి 25కి సరిగ్గా సంవత్సరం అయ్యింది. ఈ సందర్భంగా ఈ సినిమాలో సీతగా నటించిన బాలీవుడ్ భామ ఆలియా భట్ ఎన్టీఆర్ పిల్లలకు ప్రత్యక బహుమతులు పంపింది. ఈ విషయాన్ని స్వయంగా తారక్ తన సోషల్ మీడియా ఖాతాలో పోస్ట్ చేస్తూ ఆలియాకు కృతజ్ఞతలు తెలపడంతో వైరల్గా మారింది.
ఆర్ఆర్ఆర్ సినిమాలో ఎన్టీఆర్కి జోడీగా హాలీవుడ్ భామ ఓలీవియా నటించగా రామ్ చరణ్కు జోడీగా బాలీవుడ్ భామ ఆలియా భట్ నటించిన సంగతి తెలిసిందే. ఈ సినిమా షూటింగ్ సమయంలోనే ఎన్టీఆర్, ఆలియా భట్ మంచి స్నేహితులయ్యారు. ప్రమోషన్లలో వీరి అల్లరి అభిమానులను అలరించింది. ఈ నేపథ్యంలో ఎన్టీఆర్ కుమారులకు సర్‌ప్రైజ్‌ ఇస్తూ స్పెషల్ గిఫ్ట్ పంపించింది ఆలియా భట్. ఈ వివరాలను సోషల్ మీడియాలో పోస్ట్ చేస్తూ ఆలియాకు స్పెషల్ థాంక్స్ చెప్పారు ఎన్టీఆర్. సినిమాలతో పాటు వ్యాపారంలోనూ రాణిస్తున్న ఆలియా కాన్షియస్ క్లాతింగ్ పేరుతో ఓ దుస్తుల వ్యాపారాన్ని ప్రారంభించింది. ఈ క్రమంలోనే ఎన్టీఆర్ కుమారులు అభయ్ రామ్, భార్గవ్ రామ్‌లకు ఆ కంపెనీ దుస్తులను ప్యాక్ చేసి పంపించింది. యూ ఆర్ మై ఫేవరెట్ హ్యూమన్ బీన్ అనే బ్యాగ్ లో ప్యాక్ చేయడమే గాక.. ఆ బ్యాగులపై అభయ్ రామ్, భార్గవ్ రామ్ పేర్లు కూడా రాసిపెట్టింది. ఈ రెండు బ్యాగ్స్ ఫొటో జతచేసి కృతజ్ఞతలు తెలిపారు ఎన్టీఆర్. ‘థ్యాంక్స్‌ అలియా.. నీ క్లాతింగ్ బ్రాండ్ గిఫ్ట్స్ అభయ్ రామ్, భార్గవ్ రామ్ ముఖాల్లో సంతోషాన్ని నింపింది. నా పేరు మీద కూడా ఓ బ్యాగ్ చూడాలనుకుంటున్నా..’ అంటూ సరదా కామెంట్ కూడా జోడించారు తారక్.
RRR సినిమాలో అల్లూరి సీతారామ రాజుగా రామ్ చరణ్ నటించగా, కొమురం భీం పాత్రలో ఎన్టీఆర్, సీతగా ఆలియా భట్ కనిపించింది. ఈ పాత్రలు సినిమాలో ప్రత్యేకంగా నిలిచాయి. ప్రస్తుతం కొరటాల శివ దర్శకత్వంలో మరో సినిమా చేస్తున్నారు ఎన్టీఆర్. నందమూరి తారక రామారావు ఆర్ట్స్, యువసుధ ఆర్ట్స్ సంయుక్త సమర్పణలో ఎన్టీఆర్ 30 అనే వర్కింగ్ టైటిల్ తో ఈ సినిమాను రూపొందిస్తున్నారు. ఈ చిత్రంలో ఎన్టీఆర్ సరసన అతిలోక సుందరి శ్రీదేవి కూతురు జాన్వీ కపూర్ నటిస్తున్న విషయం తెలిసిందే.
