Saiee Manjrekar: ఆ హీరోలతో నటించాలని ఉంది!
Hyderabad: కరోనా తర్వాత థియేటర్లకు కళ తెచ్చిన అఖండ వంటి బ్లాక్ బస్టర్ తరువాత బోయపాటి శ్రీను(Boyapati Srinivas), ఎనర్జిటిక్ హీరో రామ్ పోతినేనితో (Ram Pothineni) కలిసి ఓ సినిమా చేస్తున్న సంగతి తెలిసిందే. ఇటీవలే ఈ మూవీ నుంచి ఫస్ట్ లుక్ పోస్టర్ కూడా రిలీజ్ అయ్యింది. ఈ పోస్టర్లో రామ్ డిఫరెంట్ లుక్ లో కనిపించి ఆకట్టుకున్నాడు. ఈ మూవీలో రామ్ సరసన కన్నడ భామ శ్రీలీల (Sreeleela) హీరోయిన్గా నటిస్తోంది. కాగా, తాజాగా ఈ చిత్రంలో తాను కూడా నటిస్తున్నట్లు ముంబై భామ సయీ మంజ్రేకర్(Saiee Manjrekar) తెలియజేసింది.
సయీ మంజ్రేకర్.. సల్మాన్ ఖాన్ (Salman Khan) దబాంగ్ 3 తో సినిమా వెండితెరకి పరిచయమైంది. టాలీవుడ్ లోనూ మెగా హీరో వరుణ్ తేజ్ సరసన గని సినిమాలో నటించి అలరించింది. అయితే ఈ భామకి మంచి గుర్తింపు తెచ్చిన సినిమా ‘మేజర్’. అడివిశేష్ హీరోగా తెరకెక్కిన ఈ సినిమా పాన్ ఇండియా స్థాయిలో మంచి విజయాన్ని అందుకుంది. ప్రస్తుతం హిందీలో రెండు చిత్రాల్లో నటిస్తున్న సయీ.. తాజాగా రామ్ చిత్రంలో సెకండ్ హీరోయిన్గా ఛాన్స్ దక్కించుకుంది.
తాజాగా ఈ భామ ఓ ఇంటర్వ్యూలో మాట్లాడుతూ.. ‘రామ్ నిజంగా ఎనర్జిటిక్ స్టార్. మూవీ సెట్ లో చాలా ఉత్సాహంగా ఉంటారు. సీన్స్ చిత్రీకరణ టైంలో నాకు చాలా సహాయపడేవారు. ఈ మూవీతో మీరంతా ఒక సరికొత్త రామ్ ని చూడబోతున్నారు’ అంటూ చెప్పుకొచ్చింది. అలాగే సౌత్ హీరోల గురించి మాట్లాడుతూ.. ‘సౌత్లో ఎన్టీఆర్(NTR), అల్లు అర్జున్(Allu Arjun), రామ్ చరణ్(Ram Charan) క్రేజ్ ఎంటో చెప్పక్కర్లేదు. చాలా గొప్ప యాక్టర్స్. నాకు వాళ్లతో కలిసి నటించాలని ఉంది’ అంటూ మనసులో మాట బయటపెట్టింది ఈ ముంబై భామ.
