Anant Ambani వాచ్.. మార్క్ జుకర్ బర్గ్ భార్య షాక్
Anant Ambani: అనంత్ అంబానీ- రాధికా మర్చంట్ ప్రీ వెడ్డింగ్ వేడుకలు అంగరంగ వైభవంగా జరిగాయి. గుజరాత్ జామ్నగర్ మొత్తం 3-4 రోజులు ప్రముఖులతో నిండిపోయింది. పెళ్లి వేడుకల్లో భాగంగా.. అనంత్ అంబానీ సృష్టించిన జంతు సంరక్షణ, పునరావాస శిబిరానికి అతిథుల్ని తీసుకెళ్లారు. అక్కడ అనంత్ వాచ్‌పైనే అందరి దృష్టి పడింది. దాని ఖరీదు ఏకంగా రూ. 14 కోట్లు అని తెలుస్తోంది.
భారత్‌లోనే అత్యంత సంపన్నుడు, రిలయన్స్ ఇండస్ట్రీస్ అధినేత ముకేశ్ అంబానీ చిన్న కుమారుడు అనంత్ అంబానీ వివాహ వేడుకలు అంబరాన్నంటాయి. జులైలో ఆయన వీరెన్ మర్చంట్ కుమార్తె రాధికా మర్చంట్‌ను పెళ్లి చేసుకోనుండగా.. ఇప్పుడు ప్రీ వెడ్డింగ్ వేడుకలు నిర్వహించారు. మార్చి 1-3 మధ్య గుజరాత్ జామ్నగర్ వేదికగా అట్టహాసంగా ఈ వేడుకలు జరిగాయి. భారత్ సహా ప్రపంచ దేశాల నుంచి దిగ్గజ పారిశ్రామిక వేత్తలు, సినీ, క్రీడా, రాజకీయ ప్రముఖులు ఈ కార్యక్రమాలకు హాజరయ్యారు. జామ్నగర్ మొత్తం సెలబ్రిటీలతో నిండిపోయింది. అడుగడుగునా అంబానీల వైభవం కనిపిస్తోంది. సోషల్ మీడియాలో కూడా ఎక్కడ చూసినా వీరి పెళ్లి గురించే చర్చ నడుస్తోంది.
3 రోజుల ప్రీ వెడ్డింగ్ వేడుకల్లో భాగంగా రెండో రోజు అతిథుల్ని.. అనంత్ అంబానీ వంతారా (జంతు సంరక్షణ, పునరావాస కేంద్రం) సందర్శించే ఏర్పాట్లు చేశారు. జంగిల్ ఫీవర్ డ్రెస్ కోడ్‌లో ‘ఏ వాక్ ఆన్ ది వైల్డ్‌సైడ్’ అనే థీమ్‌తో వంతారాను సందర్శించారు. అక్కడే ఇక్కడి ప్రదేశాలు ఏమన్నా చూడాలనుకుంటే ఏర్పాట్లు చేస్తానని అనంత్.. మార్క్, ప్రిసిల్లాతో చెబుతున్నారు. (Anant Ambani)
దీనికి సంబంధించి సోషల్ మీడియాలో ఇప్పుడు ఒక వీడియో చక్కర్లు కొడుతోంది. ఫేస్‌బుక్ మాతృసంస్థ మెటా సీఈఓ మార్క్ జుకర్ బర్గ్, తన సతీమణి ప్రిసిల్లా చాన్ కలిసి అనంత్ అంబానీతో మాట్లాడుతుండటం ఆ వీడియోలో గమనించొచ్చు.
సరిగ్గా అప్పుడే జుకర్ బర్గ్ భార్య ప్రిసిల్లా.. అనంత్ చేతికి ఉన్న ఖరీదైన డిజైనర్ వాచ్‌ను ఆసక్తిగా పరిశీలిస్తుంది. ‘ఈ వాచ్ అద్భుతంగా ఉంది. చాలా బాగుంది. వావ్’ అంటుంది. ఇప్పటికే అతనికి నేను ఈ విషయం చెప్పాను అంటారు మార్క్. అప్పుడే తనకు వాచీలంటే అస్సలు ఇష్టం ఉండదని, అసలు ధరించనని.. కానీ అంబానీ చేతి గడియారం చూస్తే మనసు మార్చుకోవాలనిపిస్తుందని అన్నారు జుకర్‌బర్గ్. ఇక ‘నాకు ఆ వాచ్ కావాలి.’ అని ప్రిసిల్లా అడగడం.. మార్క్ నో చెప్పడం కూడా చూడొచ్చు. ఈ వాచ్ ఎవరు తయారు చేశారని ప్రిసిల్లా అడగ్గా.. రిచర్డ్ మిల్లే అని అనంత్ చెప్పారు.
అయితే అనంత్ అంబానీ ధరించిన ఆ రిచర్డ్ మిల్లే వాచ్ ఖరీదు దాదాపు రూ.14 కోట్లు ఉంటుందని అని అంతా చర్చించుకుంటున్నారు. ఇక ఇది రోల్స్ రాయిస్ కార్ల ధరల కంటే ఎక్కువని తెలుస్తోంది. రోల్స్ రాయిస్ కార్లు రూ. 6 కోట్ల నుంచి ప్రారంభమవుతాయి. ఈ రిచర్డ్ మిల్లే వాచ్ తయారీలో టైటానియం, కార్బన్ ఫైబర్, సెరమిక్స్ వంటి హై టెక్ మెటీరియల్స్ వాడుతుంటారు. ఇవి చాలా కాలం పాటు పనిచేస్తాయి.. ఇంకా తీవ్ర ప్రతికూల పరిస్థితుల్ని కూడా తట్టుకోగలవు. దీనికి 20 ప్రత్యేకతలు ఉన్నాయి. రివర్సిబుల్ మెకానిజం, రెండు ఇండిపెండెంట్ డయల్స్, 6 పేటెంట్ ఆవిష్కరణలను ఈ వాచ్ కలిగి ఉంది. ఎంచుకున్న సమయానికి ప్రత్యేక శబ్దంతో అలర్ట్ చేసే అలారం, డేట్ రిపీటర్, మాన్యువల్ ఆపరేటర్ దీని అదనపు ప్రత్యేకతలు. వైట్ గోల్డ్ కలర్‌ దీనికి మరింత వన్నె తీసుకొచ్చింది. ఫ్రంట్, బ్యాక్ డయల్‌ను కలిగి ఉంటుంది.
