Manoj Tiwary: నన్ను ఎందుకు తప్పించారో ధోనీని అడగాలనుకుంటున్నా

Manoj Tiwary: టీమిండియా మాజీ ప్లేయర్ మనోజ్ తివారీ సంచలన వ్యాఖ్యలు చేశాడు. రిటైర్మెంట్ తర్వాత ఏర్పాటు చేసిన సన్మాన కార్యక్రమంలో పాల్గొన్న 38 ఏళ్ల మనోజ్ తివారీ.. మహేంద్ర సింగ్ ధోనీని (Mahender Singh Dhoni) తాను ఒక ప్రశ్న అడగాలని భావిస్తున్నట్లు చెప్పాడు. సెంచరీ చేసిన తర్వాత కూడా తనను ఎందుకు జట్టు నుంచి తప్పించాడా అని అడగాలని ఉందని మనసులోని మాటను వెల్లడించాడు తివారీ.

టీమిండియా క్రికెటర్, దేశవాళీల్లో బెంగాల్ జట్టు కెప్టెన్, ప్రస్తుతం పశ్చిమ బెంగాల్ క్రీడాశాఖ మంత్రి మనోజ్ తివారీ క్రికెట్‌కు వీడ్కోలు పలికిన విషయం తెలిసిందే. వాస్తవానికి రంజీ సీజన్ 2023-2024కు ముందే ఈ బెంగాల్ క్రికెటర్ ఆటకు వీడ్కోలు పలికాడు. కానీ బెంగాల్ క్రికెట్ అసోసియేషన్ సూచన మేరకు మనోజ్ తన నిర్ణయాన్ని వెనక్కి తీసుకున్నాడు. ఈ సీజన్ ఆడిన తర్వాత తప్పుకుంటానని వెల్లడించాడు. ఇచ్చిన మాట ప్రకారం బెంగాల్ తరఫున ఈ రంజీ సీజన్ ఆడిన మనోజ్ తివారీ.. సుమారు 20 ఏళ్ల ఫస్ట్ క్లాస్ క్రికెట్‌కు గుడ్‌బై చెప్పేశాడు. ఈ క్రమంలో తన కెరీర్‌లో చివరి రంజీ మ్యాచ్ ఆడిన అతడిని బెంగాల్ క్రికెట్ అసోసియేషన్ సన్మానించింది.

38 ఏళ్ల మనోజ్ తివారీ భారత్ తరఫున కూడా ఆడాడు. 12 వన్డే మ్యాచులు ఆడిన ఈ ప్లేయర్.. 287 రన్స్ స్కోరు చేశాడు. 3 అంతర్జాతీయ టీ20 మ్యాచులు సైతం ఆడాడు. కాగా 2011లో చెన్నై వేదికగా వెస్టిండీస్‌తో జరిగిన వన్డే మ్యాచులో సెంచరీ కూడా చేశాడు. అయితే రిటైర్మెంట్ తర్వాత ఓ కార్యక్రమంలో మాట్లాడిన తివారీ.. ఆసక్తికర వ్యాఖ్యలు చేశాడు. టీమిండియా మాజీ కెప్టెన్ మహేంద్ర సింగ్ ధోనీని ఓ ప్రశ్న అడగాలని ఉందని చెప్పుకొచ్చాడు.

“2011లో వెస్టిండీస్‌పై సెంచరీ చేసిన తర్వాత తుది జట్టు నుంచి నన్ను ఎందుకు తప్పించారు అనే విషయాన్ని నేను అప్పటి కెప్టెన్ మహేంద్ర సింగ్ ధోనీని అడగాలని ఉంది. రోహిత్ శర్మ, విరాట్ కోహ్లీ లాగా రాణించే సత్తా నాకు ఉంది. అయినా తగినన్ని అవకాశాలు రాలేదు. ఇప్పుడేమో చాలా మంది ప్లేయర్లకు ఎన్నో అవకాశాలు వస్తున్నాయి. దాన్ని నేను టీవీల్లో చూసినప్పుడు బాధగా ఉంటుంది” అని కోల్‌కతా స్పోర్ట్స్ జర్నలిస్ట్ క్లబ్‌లో తన సన్మానం సందర్బంగా మనోజ్ తివారీ మనసులోని మాటను వెల్లడించాడు.

కాగా 38 ఏళ్ల మనోజ్ తివారీ ఇటీవల రంజీ ట్రోఫీని, బీసీసీఐని ఉద్దేశించి తీవ్ర వ్యాఖ్యలు చేశారు. రంజీ ట్రోఫీని రద్దు చేయాలని సోషల్ మీడియాలో పోస్టు చేశాడు. టీమిండియా సెంట్రల్ కాంట్రాక్ట్ ఉన్న ప్లేయర్లు దేశవాళీ క్రికెట్ నుంచి వైదొలగడాన్ని ప్రస్తావిస్తూ ఈ మేరకు పోస్టు చేశాడు. ఖాళీ సమయం దొరికినప్పుడు పలువురు క్రికెటర్లు రంజీ మ్యాచులను స్కిప్ చేసి.. దుబాయ్ లేదా ఇతర ప్రాంతాలకు వెళ్తున్నారని పేర్కొన్నాడు. ఇలా చేయడం వల్ల రంజీ ట్రోఫీ ప్రాముఖ్యత తగ్గిపోతుందని ఆవేదన వ్యక్తం చేశాడు. అయితే అప్పటికి మనోజ్ క్రికెట్‌లో కొనసాగుతుండటంతో.. దీనిపై బీసీసీఐ చర్యలు తీసుకుంది. మ్యాచు ఫీజులో 20 శాతం కోతం విధించింది.