తాడేపల్లికి గుడ్‌బై.. జ‌గ‌న్ కోసం కొన్న విల్లాలు లీజ్‌కి!
YSRCP: వైఎస్సార్ కాంగ్రెస్ సీనియ‌ర్ నేత‌లు విజ‌య‌సాయి రెడ్డి, చెవిరెడ్డి భాస్క‌ర్ రెడ్డిలు తాడేపల్లికి గుడ్‌బై చెప్పేసిన‌ట్లే అని తెలుస్తోంది. వీరిద్దరూ మాజీ ముఖ్య‌మంత్రి జ‌గ‌న్ మోహ‌న్ రెడ్డికి అత్యంత సన్నిహితులు. జ‌గ‌న్ అధికారంలోకి వ‌చ్చాక తాడేప‌ల్లిలో నివాసం ఉంటున్నార‌ని ఆయ‌న్ను త‌ర‌చూ క‌లుస్తుండాల‌న్న ఉద్దేశంతో వీరిద్దరూ జ‌గ‌న్ నివాసానికి ప‌ది కిలోమీట‌ర్ల దూరంలో విల్లాల‌ను కొనుగోలు చేసార‌ట.
భాస్క‌ర్ రెడ్డి ఒక విల్లా కొన‌గా.. విజ‌య‌సాయి రెడ్డి రెండు విల్లాల‌ను కొనుగోలు చేసారు. జ‌గ‌న్ కోసం అదే విల్లాల్లో నివ‌సించేవారు. ఇప్పుడు పార్టీ అధికారం కోల్పోయింది. దాంతో ఈ ఇద్ద‌రు బ‌డా నేత‌లు తాడేప‌ల్లి ముఖం చూడ‌టం మానేసార‌ట. ఇక ఆ విల్లాల్లో ఉండే అవ‌స‌రం లేదు కాబ‌ట్టి.. వాటిని లీజ్‌కి ఇచ్చేసిన‌ట్లు తెలుస్తోంది. విజ‌య‌సాయి రెడ్డి త‌న రెండు విల్లాల‌ను ఓ కార్పొరేట్ కంపెనీ మీటింగ్‌లు ఏర్పాటు చేసుకునేందుకు ఇచ్చేసిన‌ట్లు టాక్ న‌డుస్తోంది. ఇక భాస్క‌ర్ రెడ్డి తాడేప‌ల్లిలో కొన్న విల్లాతో పాటు హైద‌రాబాద్‌లో కొన్న విల్లాను కూడా వేరొక‌రికి అమ్మేసిన‌ట్లు స‌మాచారం.
