Uday Saharan: ఫెయిల‌య్యాం.. ఒప్పేసుకున్న సహారన్
Uday Saharan: ర్యాంప్‌ షాట్లు ఆడటంతో పాటు ఓపికగా బ్యాటింగ్ చేయకపోవడం తమ ఓటమిని శాసించిందని టీమిండియా అండర్ 19 కెప్టెన్ (U-19) ఉదయ్ సహారన్ తెలిపాడు. ఆస్ట్రేలియాతో ఆదివారం జరిగిన అండర్ 19 ప్రపంచకప్ ఫైనల్లో భారత్ 79 పరుగుల భారీ తేడాతో ఓటమిపాలైంది. దాంతో ఛాంపియన్‌గా నిలిచే అవకాశాన్ని తృటిలో చేజార్చుకుంది. టోర్నీ ఆసాంతం అద్భుత ప్రదర్శన కనబర్చిన టీమిండియా ఓటమెరుగని జట్టుగా ఫైనల్ చేరింది. కానీ కీలక పోరులో ఒత్తిడిని తట్టుకోలేక ఓటమికి తల వంచింది.
తొలుత బ్యాటింగ్ చేసిన ఆస్ట్రేలియా నిర్ణీత 50 ఓవర్లలో 7 వికెట్లకు 253 పరుగులు చేసింది. హర్జాస్ సింగ్(64 బంతుల్లో 3 ఫోర్లు, 3 సిక్సర్లతో 55) హాఫ్ సెంచరీతో రాణించగా.. కెప్టెన్ హ్యూ వీబ్జెన్(66 బంతుల్లో 5 ఫోర్లతో 48), ఓలివర్ పీక్(43 బంతుల్లో 2 ఫోర్లు, సిక్స్‌తో 46 నాటౌట్), హ్యారీ డిక్సాన్(56 బంతుల్లో 3 ఫోర్లు, సిక్స్‌తో 42) కీలక ఇన్నింగ్స్ ఆడారు. అనంతరం లక్ష్య ఛేదనలో భారత్ 43.5 ఓవర్లలో 174 పరుగులకు కుప్పకూలింది. ఆదర్శ్ సింగ్(77 బంతుల్లో 4 ఫోర్లు, సిక్స్‌తో 47), హైదరాబాద్ ప్లేయర్ మురుగణ్ అభిషేక్( 46 బంతుల్లో 5 ఫోర్లు, సిక్స్‌తో 42 )టాప్ స్కోరర్లుగా నిలిచారు. లీగ్ దశలో సెంచరీల మోత మోగించిన సర్ఫరాజ్ ఖాన్ తమ్ముడు ముషీర్ ఖాన్(22), సచిన్ దాస్(9), కెప్టెన్ ఉదయ్ సహరణ్(8) దారుణంగా విఫలమయ్యారు.
ALSO READ: MS Dhoni: కొంద‌రు అలా ఫీల‌వుతుంటారు.. ఏం చేస్తాం
ఆస్ట్రేలియా బౌలర్లలో మహిల్ బియర్డ్‌మన్(3/15), రాఫ్ మెక్‌మిలన్(3/43) మూడేసి వికెట్లు తీయగా.. కల్లమ్ విడ్లేర్(2/35) రెండు వికెట్లు పడగొట్టాడు. చార్లీ అండర్సన్, టామ్ స్ట్రేకర్ చెరో వికెట్ తీసారు. కాగా అంతకముందు డబ్ల్యూటీసీ, వన్డే వరల్డ్‌కప్‌ ఫైనల్లో సీనియర్‌ జట్టు చేతిలో రోహిత్‌ సేన ఓటమి పాలవ్వగా.. ఇప్పుడు జూనియర్లు కూడా అదే ఫలితాన్ని పునరావృతం చేశారు.
ఈ మ్యాచ్ అనంతరం తమ పరాజయంపై స్పందించిన భారత కెప్టెన్ ఉదయ్ సహారన్… తమ ఓటమికి కారణం బ్యాటింగ్ వైఫల్యమేనని సహారన్ అంగీకరించాడు. “ఈ టోర్నీ మొత్తం మా బాయ్స్‌ అద్బుతమైన ప్రదర్శన కనబరిచారు. వారి ఆటతీరు పట్ల నాకు చాలా గర్వంగా ఉంది. ప్రతీ ఒక్కరూ జట్టు కోసం తమ వంతు కృషి చేశారు. కానీ దురదృష్టవశాత్తూ ఫైనల్ మ్యాచ్‌లో ఓడిపోయాం. బ్యాటింగ్‌లో మేము సమిష్టిగా విఫలమయ్యాం. మేము ఈ మ్యాచ్ కోసం బాగా సన్నద్దమయ్యాం. కానీ మా ప్రణాళికలను అమలు చేయడంలో ఫెయిల్‌ అయ్యాం. మా బాయ్స్‌ కొంతమంది ర్యాంప్‌ షాట్లు ఆడి ఔటయ్యారు. ఆదర్శ్‌తో పాటు ఎవరో ఒకరు క్రీజులో ఉండి ఉండే పరిస్థితి మరోవిధంగా ఉండేది. అయితే ఈ టోర్నమెంట్‌ నుంచి మేము చాలా విషయాలు నేర్చుకున్నాం. మ్యాచ్‌ల సందర్భంగా సపోర్ట్ స్టాఫ్ మా భవిష్యత్తుకు ఉపయోగపడే ఎన్నో సూచనలు, సలహాలు ఇచ్చారు. ఈ టోర్నీలో ఆడిన అనుభవం భవిష్యత్తులో మాకు ఉపయోగపడుతుందని” పోస్ట్‌మ్యాచ్‌ ప్రేజేంటేషన్‌లో సహారన్ పేర్కొన్నాడు. కాగా ఈ టోర్నీలో 397 పరుగులు చేసిన సహారన్ టాప్ రన్‌ స్కోరర్‌గా నిలిచాడు.
ఓవరాల్‌గా ఇప్పటివరకూ భారత్ 9సార్లు అండర్-19 ప్రపంచకప్ ఫైనల్స్ ఆడగా.. 2000, 2008, 2012, 2018, 2022లో మొత్తం 5 సార్లు ఛాంపియన్‌గా నిలిచింది. ఇంతకు ముందు 2006, 2016, 2020లలో ఫైనల్లో ఓటమిపాలైంది. తాజాగా ఆదివారం ఆస్ట్రేలియాతో జరిగిన ఫైనల్లోనూ డిఫెండింగ్ ఛాంపియన్ యువ భారత్ తుది మెట్టుపై బోల్తాపడింది. అండర్ 19 ప్రపంచకప్ ఫైనల్లో ఆస్ట్రేలియా, భారత్ జట్లు ఇప్పటివరకు 4 సార్లు తలపడగా.. చెరో రెండు ఫైనల్స్ నెగ్గి మెగా ట్రోఫీని అందుకున్నాయి.
