ఓవర్సీస్లోనూ కోట్లు కొల్లగొడుతున్న తెలుగు సినిమాలు!
దేశవ్యాప్తంగానే కాకుండా ఓవర్సీస్లోనూ దుమ్ము లేపుతున్నాయి టాలీవుడ్ సినిమాలు. పాన్ ఇండియా, పాన్ వరల్డ్ సినిమాలుగా విడుదలవుతూ భారీ కలెక్షన్లతో దూసుకుపోతున్నాయి. తాజాగా విడుదలైన నేచురల్ స్టార్ నాని దసరా సినిమా ఓవర్సీస్లోనూ భారీ కలెక్షన్లను రాబడుతోంది. ఇక, భారీ బడ్జెట్తో రూపొందుతున్న మహేష్ SSMB28, ప్రభాస్ సలార్ సినిమాలు కూడా ఓవర్సీస్ బిజినెస్ని భారీ ధరలతో ముగించినట్టు తెలుస్తోంది.
యంగ్ రెబల్ స్టార్ ప్రభాస్, కన్నడ డైరెక్టర్ ప్రశాంత్ నీల్ దర్శకత్వంలో రూపొందుతున్న సినిమా సలార్. కేజీఎఫ్ వంటి బ్లాక్బస్టర్ అందించిన ప్రశాంత్ రూపొందిస్తున్న ఈ సినిమా పై భారీ అంచనాలు నెలకొన్నాయి. యాక్షన్ థ్రిల్లర్ గా విడుదల కాబోతున్న ఈ సినిమాలో శృతిహాసన్ హీరోయిన్ గా నటిస్తోంది. ప్రముఖ మలయాళం నటుడు పృథ్వీరాజ్ సుకుమారన్ ఈ సినిమాలో కీలక పాత్రలో కనిపించనున్నారు. తాజాగా ఈ చిత్ర ఓవర్సీస్ హక్కులు ఏకంగా 70 కోట్లకు అమ్ముడు అయినట్లు తెలుస్తోంది. హోంబలే ఫిలిమ్స్ పతాకం పై విజయ్ కిరగందూర్ ఈ సినిమాని 200 కోట్ల బడ్జెట్ తో భారీ స్థాయిలో ప్రతిష్టాత్మకంగా నిర్మిస్తున్నారు. రవి బశ్రుర్ సంగీతాన్ని అందిస్తున్న ఈ సినిమా భారీ అంచనాల మధ్య ఈ ఏడాది సెప్టెంబర్ 28న ప్రపంచవ్యాప్తంగా విడుదల కాబోతోంది. జగపతిబాబు, మధు గురుస్వామి, ఈశ్వరి రావు, శ్రీయ రెడ్డి తదితరులు కూడా ఈ సినిమాలో ముఖ్య పాత్రలలో కనిపించబోతున్నారని తెలుస్తోంది.
ఇక, టాలీవుడ్ సూపర్ స్టార్ మహేష్ బాబు, త్రివిక్రమ్ శ్రీనివాస్ కాంబినేషన్ లో హ్యాట్రిక్ మూవీ తెరకెక్కుతోన్న సంగతి తెలిసిందే. SSMB28 వర్కింగ్‌ టైటిల్‌తో తెరకెక్కుతున్న ఈ సినిమా షూటింగ్ జోరుగా సాగుతోంది. అతడు, ఖలేజా సినిమాల తర్వాత వీరిద్దరి కాంబినేషన్‌లో తెరకెక్కుతున్న సినిమా కావడంతో అటు అభిమానుల్లోనూ ఇటు ఇండస్ట్రీ వర్గాల్లోనూ ఈ సినిమాపై భారీ అంచనాలే ఉన్నాయి. హారిక అండ్ హాసిని బ్యానర్ లో రూపొందుతున్న ఈ సినిమాలో బుట్ట బొమ్మ పూజా హెగ్దే తో పాటు ధమాకా బ్యూటీ శ్రీలీల కూడా హీరోయిన్ గా నటిస్తున్నారు. ఈ సినిమా రిలీజ్ డేట్‌ను కూడా ప్రకటించారు మేకర్స్. థమన్ సంగీతం అందిస్తున్న ఈ మూవీ రాబోయే సంక్రాంతి కానుకగా జనవరి 13,2024న విడుదల కానుంది. తాజాగా, ఈ సినిమా బిజినెస్ గురించిన ఓ వార్త హల్ చల్ చేస్తోంది.
ఈ మూవీ ఓవర్సీస్ రైట్స్ భారీ ధరకు అమ్ముడు పోయినట్లు తెలుస్తోంది. మొత్తంగా ఈ సినిమా ఓవర్సీస్ హక్కులను రూ.14.50 కోట్లకు కోట్ చేశారు. ఇది భారీ మొత్తం అని ట్రేడ్ వర్గాలు చెబుతున్నాయి. ఇప్పటికే ఈ మూవీ ఓటీటీ హక్కులని రూ.81 కోట్లకి ప్రముఖ సంస్థ నెట్ ఫ్లిక్స్ దక్కించుకుంది. ఈ సినిమాను పాన్ ఇండియా రేంజ్‌లో విడుదల చేయడానికి ప్లాన్ చేస్తున్నారు. SSMB28 సినిమాను రూ.150 కోట్ల బడ్జెట్ తో తెరకెక్కిస్తున్నారు. ఇక, ఈ మూవీలో మహేష్ బాబు మాస్ యాక్షన్ రోల్ పోషిస్తుండగా, సీనియర్ నటి రమ్యకృష్ణ కీలక పాత్రతో నటిస్తున్నారు. హారికా హాసిని క్రియేషన్స్ సంస్థ ఈ సినిమాను గ్రాండ్ గా నిర్మిస్తోంది. రిలీజ్కి ముందే ఈ రేంజ్ బిజినెస్ చేసిన సినిమాలు తర్వాత ఏ రేంజ్ కలెక్షన్లు కురిపిస్తాయో చూడాలి మరి!
