బాలీవుడ్ టాక్ షోలో సౌత్ సూపర్ స్టార్స్!
బాలీవుడ్ ఫిల్మ్ మేకర్ కరణ్ జోహర్ హోస్ట్ చేస్తున్న ‘కాఫీ విత్ కరణ్’ నేషనల్ లెవల్లోనే టాప్ టాక్ షోగా కొనసాగుతోంది. సక్సెస్ఫుల్గా 7 సీజన్లను పూర్తిచేసుకున్న ఈ షో 8వ సీజన్ను త్వరలోనే ప్రారంభించనున్నట్లు తెలుస్తోంది. ఆగస్టు లేదా సెప్టెంబర్‌లో ఈ షో తదుపరి సీజన్ మొదలవుతుందని బాలీవుడ్ ఇన్సైడ్ టాక్. అయితే, ఈసారి కేవలం బాలీవుడ్ స్టార్స్‌ను మాత్రమే కాకుండా, దక్షిణాది నుంచి పాన్ ఇండియా స్టార్స్‌గా ఎదిగిన ముగ్గురు టాప్ స్టార్స్‌ను ఈ షోలో గెస్టులుగా కూర్చోబెట్టబోతున్నాడట కరణ్. అంతేకాదు 8వ సీజన్ తొలి ఎపిసోడ్‌ను బాలీవుడ్ బాద్‌షా షారుఖ్ ఖాన్‌తో స్టార్ట్ చేసేందుకు రెడీ అవుతున్నాడట. ఇంతకీ ఈ షోలో పాల్గొనబోతున్న సౌత్ స్టార్స్ ఎవరో తెలుసా..? తమ సినిమాలతో పాన్ ఇండియా స్టార్లుగా ఎదిగిన అల్లు అర్జున్, యశ్, రిషబ్ షెట్టి. ఇప్పటికే ఆర్ఆర్ఆర్ మూవీ ప్రమోషన్స్లో భాగంగా మెగాపవర్ స్టార్ రామ్ చరణ్, యంగ్ టైగర్ ఎన్టీఆర్తో పాటు దర్శకధీరుడు రాజమౌళి ఈ టాక్ షోలో సందడి చేసిన సంగతి తెలిసిందే.
‘పుష్ప-ది రైజ్’ మూవీతో పాన్ ఇండియా స్టార్‌గా అవతరించిన అల్లు అర్జున్, ఆ సినిమాతో బాక్సాఫీస్ వద్ద పలు సరికొత్త రికార్డులను క్రియేట్ చేశాడు. సుకుమార్ దర్శకత్వంలో వచ్చిన ఈ సినిమా దేశవ్యాప్తంగా రికార్డులు సృష్టించింది. ప్రస్తుతం ఈ సినిమా సీక్వెల్ పుష్ప 2 షూటింగ్తో బిజీగా ఉన్నాడు బన్నీ. ఇక దక్షిణాదిన కేజీయఫ్ చిత్రంతో మరో పాన్ ఇండియా హీరోగా ఎదిగారు కన్నడ స్టార్ యశ్. కేజీయఫ్ 2 సినిమాతో తన స్టార్‌డమ్‌ను మరింతగా పెంచేసుకున్న ఈ హీరో ఇటు దక్షిణాదినీ, అటు బాలీవుడ్ని ఒకే సినిమాతో ఆకట్టుకున్నాడు. ఇక, కాంతార వంటి వైవిధ్యమైన సినిమాను తెరకెక్కించిన యాక్టర్ కమ్ డైరెక్టర్ రిషబ్ శెట్టి కూడా ఇప్పుడు పాన్ ఇండియా స్టార్‌గా మారిపోయాడు. కాంతార చిత్రం భాషతో సంబంధం లేకుండా సెన్సేషన్ క్రియేట్ చేసింది. ఇప్పుడు ఈ ముగ్గురు సౌత్ ఇండియా స్టార్స్ కాఫీ విత్ కరణ్ షోలో కబుర్లు చెబితే అటు షోతో పాటు ఈ పాన్ ఇండియా స్టార్స్ క్రేజ్ అమాంతం పెరిగిపోవడం ఖాయమంటున్నారు అభిమానులు.
