Rana Naidu: అభిమానులకు రానా క్షమాపణ
టాలీవుడ్ స్టార్ హీరో వెంకటేష్, యంగ్ హీరో రానా దగ్గుబాటి కలిసి నటించిన వెబ్ సిరీస్ రానా నాయుడు. ప్రముఖ ఓటీటీ నెట్‌‌ఫ్లిక్స్ వేదికగా మార్చి 10న విడుదలైన ఈ సిరీస్ పలు విమర్శలు ఎదుర్కొంటున్న సంగతి తెలిసిందే. అభిమానులతోపాటు సినీ ప్రముఖులు కూడా ఇలాంటి సిరీస్ని దగ్గుబాటి హీరోల నుంచి ఊహించలేదని కామెంట్ చేస్తున్నారు. ఈ క్రమంలో రానా అభిమానులను సోషల్ మీడియా వేదికగా క్షమాపణ కోరారు.
ఫ్యామిలీ హీరోగా విక్టరీ వెంకటేష్కి క్లీన్ ఇమేజ్ ఉంది. వెంకటేష్ సినిమా అంటే ఇంటిల్లిపాది కూర్చుని చూడొచ్చనేది తెలుగు ప్రేక్షకుల అభిప్రాయం. అలాంటి వెంకటేష్ నోటి నుంచి పచ్చి బూతులు వినడం అభిమానులకు అస్సలు నచ్చడం లేదు. అందుకే సోషల్ మీడియా వేదికగా రానా నాయుడు సిరీస్పై పెద్ద ఎత్తున ట్రోలింగ్ జరుగుతోంది. ట్రైలర్ విడుదలైనప్పటినుంచే మొదలైన సందేహం ఇప్పుడు బలపడింది. తెలుగులో అందులోనూ వెంకటేష్ నటించిన సినిమాలో ఇలాంటి కంటెంట్ ఉండటం అభిమానులకు రుచించడం లేదు.
సుప్రన్ వర్మ, కరణ్ అన్షుమన్ దర్శకత్వంలో రూపొందిన ఈ వెబ్ సిరీస్ పై వ్యతిరేకత చోటు చేసుకుంది. అయినప్పటికీ ఈ వెబ్ సిరీస్ నెట్‌‌ఫ్లిక్స్ లో టాప్ ట్రెండింగ్ లో నిలిచింది. ఈ విషయాన్ని నెట్‌‌ఫ్లిక్స్ వెల్లడించింది. అయితే రానా నాయుడు విషయంలో చోటుచేసుకున్న వ్యతిరేకతపై తాజాగా దగ్గుబాటి రానా రియాక్ట్ అయ్యారు. తమ వెబ్ సిరీస్ ని ఆదరించిన ప్రేక్షక లోకానికి ధన్యవాదాలు చెబుతూ ట్వీట్ చేసిన రానా.. ఈ వెబ్ సిరీస్ కుటుంబంతో కలిసి చూడొద్దు అని చెప్పారు. ప్రతి ఒక్కరూ ఒంటరిగా చూడాలని ఆయన పేర్కొన్నారు
ఇప్పటికే పలువురు హీరోలతో మల్టీస్టారర్ సినిమాలు చేసిన వెంకటేష్.. రీసెంట్‌గా వరుణ్ తేజ్‌తో కలిసి F3 రూపంలో మరో సక్సెస్ ఖాతాలో వేసుకున్నారు. ఈ క్రమంలోనే తన ఫ్యామిలీ మెంబర్, అన్న సురేష్ బాబు కుమారుడు దగ్గుబాటి రానాతో కలిసి మరోసారి ప్రేక్షకుల ముందుకొచ్చారు. కానీ విమర్శల పాలవుతున్నారు. ఈ వెబ్ సిరీస్ హిందీతో పాటు తెలుగు, తమిళంతోపాటు ఇతర దక్షిణాది భాషల్లో స్ట్రీమింగ్ అవుతోంది. ఇన్నాళ్లు లవ్, ఫ్యామిలీ, ఎమోషన్ చిత్రాలతో అలరించిన వెంకటేష్.. ఇలాంటి సినిమా చేస్తారని ఊహించలేదంటూ బోలెడన్ని కామెంట్లు వస్తున్నాయి. తమ సిరీస్ చూసి హర్ట్ అయిన వారికి సారీ అంటూ రానా సోషల్ మీడియాలో పోస్ట్ చేశారు. అయితే ఈ సిరీస్లో బూతులను ప్రామాణికంగా తీసుకోకుండా వెంకటేష్, రానా నటనను లెక్కలోకి తీసుకుని పరిగణించాలనే వాదన కూడా వినిపిస్తోంది. ఈ సిరీస్లో కంటెంట్ అభ్యంతకరంగా ఉంటుంది కాబట్టే ప్రమోషన్స్లోనే వెంకటేష్, రానా ప్రేక్షకులను కుటుంబంతో కాకుండా ఒంటరిగా సిరీస్ చూడాల్సిందిగా కోరిన విషయం తెలిసిందే.
