ఫైన‌ల్లీ సమానంగా రెమ్యునరేషన్ వ‌చ్చింది: ప్రియాంకా చోప్రా
బాలీవుడ్లో కెరీర్ ఆరంభించి హాలీవుడ్ వరకు ఎదిగిన అందాల భామ ప్రియాంక చోప్రా. దశాబ్దంపాటు బాలీవుడ్లో స్టార్ హీరోయిన్గా రాణించిన ప్రియాంక నిక్ జొనాస్తో పెళ్లి తర్వాత హాలీవుడ్పై దృష్టి పెట్టారు. అయితే హీరోహీరోయిన్ల రెమ్యునరేషన్లో ఉండే తేడాల గురించి తరచుగా మాట్లాడే ప్రియంక మరోసారి ఆసక్తికర వ్యాఖ్యలు చేశారు. ఆమె తాజాగా నటించిన వెబ్‌సిరీస్ ‘సిటడెల్’.రిచర్డ్ మాడెన్ కీలక పాత్రను పోషించారు. అయితే, సినీ ఇండస్ట్రీలో ఎంతో కాలంగా కొనసాగుతున్నప్పటికి తనకు ఎప్పుడు హీరోతో సమానంగా రెమ్యునరేషన్ లభించలేదని, ‘సిటడెల్’ వెబ్‌సరీస్‌కు మాత్రమే తనకు హీరోతో సమానంగా పారితోషికం లభించిందని ప్రియాంక చోప్రా తెలిపారు. ఇలా సమానమైన రెమ్యునరేషన్ లభించడం అనేది 22ఏళ్లలో ఇదే మొదటిసారని ఆమె పేర్కొన్నారు. ప్రియాంక తాజాగా మీడియాకు ఇచ్చిన ఇంటర్వ్యూలో భాగంగా పలు ఆసక్తికర వ్యాఖ్యలు చేశారు. ‘చిత్ర పరిశ్రమలో 22ఏళ్లుగా పనిచేస్తున్నాను. సినిమాలు, షోలు కలుపుకొని 70పైగా చేశాను. హీరోతో సమానంగా చాలా ప్రాజెక్టులకు పనిచేశాను. అయినప్పటికీ నాకు తక్కువగా రెమ్యునరేషన్ చెల్లించేవారు. ‘సిటడెల్’ కు మాత్రమే హీరోతో సమానంగా నాకు పారితోషికం లభించింది. ఇటువంటి విషయాలను చెబితే ఇబ్బందులను ఎదుర్కొవాల్సి వస్తుంది’ అని ప్రియాంక చోప్రా చెప్పారు.
‘సిటడెల్’ స్పై యాక్షన్ థ్రిల్లర్‌గా రూపొందింది. ‘అవెంజర్స్’ ఫేమ్ రుస్సో బ్రదర్స్ దర్శకత్వం వహించారు. అమెజాన్ స్టూడియోస్ నిర్మించింది. ఈ సిరీస్ ఏప్రిల్ 28నుంచి ప్రైమ్ వీడియోలో స్ట్రీమింగ్ కానుంది. ఈ షోకు ఇండియన్ వెర్షన్ కూడా రూపొందుతుంది. ఇండియన్ వెర్షన్‌లో వరుణ్ ధావన్, సమంత రుత్ ప్రభు కీలక పాత్రలు పోషిస్తున్నారు. ఫ్యామిలీ మ్యాన్ మేకర్స్ రాజ్ అండ్ డీకే తెరకెక్కిస్తున్నారు. ఇక ఈ సిరీస్లో టాలీవుడ్ టాప్ హీరోయిన్ సమంతా రుతు ప్రభు కూడా నటించిన సంగతి తెలిసిందే.
