NTR30: తారక్ ట్వీట్ వైరల్!
ఆర్ఆర్ఆర్ ప్రభంజనం తర్వాత నందమూరి అభిమానులు ఆసక్తిగా ఎదురు చూస్తున్న సినిమా NTR30. దాదాపు సంవత్సరంపైగా తారక్ సినిమా విడుదల కాదు, కనీసం షూటింగ్ కూడా ప్రారంభం కాకపోవడంతో చాలా నిరాశ పడిపోయారు ఫ్యాన్స్. ఎట్టకేలకు ఇటీవలే NTR30 పూజా కార్యక్రమాలు పూర్తి చేసుకుని షూటింగ్ ప్రారంభమైంది. ఈ కార్యక్రమానికి దర్శకధీరుడు రాజమౌళి హాజరై ఫస్ట్ క్లాప్ కొట్టారు. కొరటాల శివ దర్శకత్వంలో రూపొందుతున్న ఈ సినిమాలో తారక్ సరసన బాలీవుడ్ బ్యూటీ జాన్వీ కపూర్ నటిస్తోంది. కాగా, ప్రస్తుతం ఈ సినిమాలోని యాక్షన్ సీక్వెల్ని రూపొందిస్తున్నట్లు తెలుస్తోంది. తాజాగా షూటింగ్ సెట్‌లోకి అడుగుపెట్టారు ఎన్టీఆర్. ఈ మేరకు ఆయన సోషల్‌ మీడియాలో అభిమానులతో ఓ వీడియోని పంచుకున్నారు.
ఏప్రిల్‌ 1న ఎన్టీఆర్ 30 సెట్‌లోకి అడుగుపెడుతున్న తారక్ వీడియో నెట్టింట వైరల్గా మారింది. ఓ గ్రాండియర్‌ సెట్‌లో ఎంట్రీ ఇస్తున్న దృశ్యాన్ని వీడియో తీసి తారక్ ట్విట్టర్‌లో షేర్ చేశారు.
అయితే ఈ సెట్‌ కోట లోపలి భాగాన్ని తలపించేలా ఉంది. అయితే ఇది రాత్రి పార్టీ సాంగ్‌ కోసం వేసిన సెట్‌ తరహాలో ఉంది. ఇక ఈ వీడియోలో తారక్ వెనక నుంచి కనిపించారు. ఆయన కూడా పూల పూల షర్ట్ ధరించడంతో ఓ పాటని ఇందులో చిత్రీకరిస్తున్నట్టు తెలుస్తుంది. ఈ వీడియోని పంచుకుంటూ షేర్ చేసిన ఎన్టీఆర్ ‘కొరటాల శివతో మళ్లీ సెట్స్కి రావడం గొప్పగా ఉంది’ అంటూ కామెంట్ జతచేశారు. దీనిపై అభిమానులు స్పందిస్తూ సంతోషం వ్యక్తం చేస్తున్నారు. రంగు రంగుల షర్ట్ ఎన్టీఆర్ మాస్‌ లోడింగ్‌ అంటూ కామెంట్స్ చేస్తున్నారు. ఇక అసలైన మాస్‌ రెడీ అవుతుందంటున్నారు. ఈ సినిమా కోస్టర్‌ ఏరియా నేపథ్యంలో వదిలేయబడ్డ ఓ గ్రామానికి చెందిన కథతో రూపొందిస్తున్నారు. అక్కడ భయం ఎరుగని ప్రజలకు భయాన్ని పరిచయం చేయడం అనే కథాంశంతో ఈ చిత్రాన్ని రూపొందిస్తున్నట్టు దర్శకుడు కొరటాల క్లారిటీ ఇచ్చారు.
ఎన్టీఆర్, కొరటాల శివ కాంబినేషన్లో వచ్చిన జనతా గ్యారేజ్‌ బ్లాక్బస్టర్ హిట్గా నిలిచింది. వీరి కాంబినేషన్లో మరో సినిమాగా ఎన్టీఆర్30 చిత్రం తెరకెక్కుతోంది. ఈ సినిమాకి హాలీవుడ్‌ టెక్నీషియన్లు వర్క్ చేస్తున్నారు. స్టంట్స్ మాస్టర్‌ కెన్నీ బేట్స్, వీఎఫెక్స్ సూపర్‌ వైజర్‌గా హాలీవుడ్‌కి చెందిన బ్రాడ్‌ మిన్నిచ్‌ వర్క్ చేస్తుండటం విశేషం. దీంతో ఈ సినిమా అంతర్జాతీయ స్టాండర్డ్స్ లో రూపొందుతుందని తెలుస్తోంది. ఈ సినిమాని ఎన్టీఆర్ ఆర్ట్స్, యువసుధ ఆర్ట్స్ పతాకాలపై కళ్యాణ్‌ రామ్‌, మిక్కిలినేని సుధాకర్‌, హరికృష్ణ కె సంయుక్తంగా నిర్మిస్తున్నారు.
