NTR30 : బ్లడ్ ట్యాంకర్ పిక్ లీక్.. కావాలని చేసిందేనా!
టాలీవుడ్లో ఒక్కో హీరోకి ఒక్కో రకమైన ఫ్యాన్ బేస్ ఉంది. వారి అభిమాన నటుడి పుట్టినరోజు, సినిమా రిలీజ్లు అంటే వాళ్లు చేసే హడావిడి మామూలుగా ఉండదు. ఇక, ఈతరం హీరోల్లో క్లాస్, మాస్ ఫ్యాన్ ఫాలోయింగ్ ఉన్న హీరోల్లో ఎన్టీఆర్ పేరు ముందుంటుంది. ఆర్ఆర్ఆర్లో కొమురం భీమ్ పాత్రలో ఒదిగిపోయి నటించి ప్రపంచవ్యాప్తంగా అభిమానులను సంపాదించుకున్నాడు తారక్. ఈ సినిమా తర్వాత ఎన్టీఆర్ తీయబోయే సినిమాపై ఏడాదికాలంగా నెలకొన్న సంశయం తాజాగా విడిపోయింది. కొరటాల శివ దర్శకత్వంలో రూపొందుతున్న NTR30 షూటింగ్ ఎట్టకేలకు ప్రారంభమైంది. ఇక ఈ సినిమా నుంచి రాబోయే అప్డేట్స్పైనే అభిమానుల ఆరాటం. అయితే ఈ విషయాన్ని గ్రహించిన మేకర్స్ షూటింగ్ల నుంచి అప్పుడప్పుడూ ఫొటోలు, మేకింగ్ వీడియోలు లీక్ చేస్తూ సినిమాపై హైప్ పెంచుతూ ఉంటారు. తాజాగా NTR30 విషయంలోనూ అదే జరిగినట్టు తెలుస్తోంది. NTR30 అని రాసున్న ఒక బ్లడ్ ట్యాంకర్ ఫొటో సోషల్ మీడియాలో చక్కర్లు కొడుతోంది.
జనతా గ్యారేజ్తో సూపర్ హిట్ ఇచ్చిన కొరటాల శివ మరోసారి యంగ్ టైగర్ ఎన్టీఆర్తో NTR30 సినిమా ప్రారంభించారు. వీరి కాంబినేషన్లో సాగే #NTR30 లాంచింగ్ ఇటీవలే జరిగింది. వాయిదా పడుతూ వచ్చిన ఈ సినిమా ఇక ఎట్టి పరిస్థితుల్లో ఆపబోమని కొరటాల చేసిన కామెంట్స్ అభిమానుల్లో ఉత్సాహం నింపాయి. ప్రస్తుతం #NTR30 కి సంబంధించి ఓ ఫొటో హాట్ టాపిక్ గా మారింది. #NTR30 పేరుతో ఉన్న ఓ బ్లడ్ ట్యాంకర్ ఫొటో లీక్ అవడంతో ఎన్టీఆర్ కోసం ఏకంగా బ్లడ్ ట్యాంకర్ నే తెచ్చారన్న చర్చ సాగుతోంది.
టాలీవుడ్ యంగ్ టైగర్గా పేరు సంపాదించుకున్నతారక్ సినిమాల్లో భారీ యాక్షన్ ఉంటుంది. కొంత మంది డైరెక్టర్లు కూడా ఎన్టీఆర్ యాక్షన్ తగినట్లుగా కథను తీర్చిదిద్దుతారు. ఆర్ఆర్ఆర్ లో తారక్, రామ్ చరణ్ ఇద్దరు నటించినా ఎన్టీఆర్ కు సంబంధించిన సీన్స్ భారీ యాక్షన్ తో ప్రేక్షకులను ఆకట్టుకున్నాయి. తారక్ ఏకంగా పులితో ఫైట్ చేయడం థియేటర్లలో కేక పెట్టించింది. దీంతో ఎన్టీఆర్ ఎలాంటి యాక్షనైనా చేయగలడని ప్రపంచ వ్యాప్తంగా చర్చ సాగుతోంది.
జనతా గ్యారేజ్కు మించి NTR30 సినిమా ఉండబోతుందని కొరటాల హింట్ ఇచ్చాడు. ఇప్పటికే #NTR30 కు సంబంధించిన పోస్టర్ ను రిలీజ్ చేశారు. ఇందులో తారక్ కత్తి చేత పట్టుకొని కనిపించారు. ఆ కత్తి మొత్తం రక్తంతో తడిసి ఉంటే.. చుట్టూ సముద్రం అల్లకల్లోలమైన దృశ్యాన్ని చూపించారు. ఈ నేపథ్యంలో NTR30 పేరుతో ఉన్న బ్లడ్ ట్యాంకర్ పిక్ ను కావాలనే లీక్ చేసినట్లు టాలీవుడ్ టాక్. స్టార్ హీరోల సినిమాలకు లీకుల సమస్య కొత్తేమీ కాకపోయినా అభిమానులు మాత్రం ఎప్పుడు ఏ అప్డేట్ వస్తుందా అని ఎదురుచూస్తూనే ఉంటారు. అయితే ఇది నిజంగానే బ్లడ్ ట్యాంకరా? లేక ట్యాంకర్ పై ఫైట్ సీన్ జరిగిందా? అనేది తెలియదు. ఏదీ ఏమైనా ఈ బ్లడ్ ట్యాంకర్ ను చూస్తే #NTR30 సినిమా రక్తమోడే అవకాశాలు ఎక్కువగా ఉంటాయేమోనని చర్చించుకుంటున్నారు అభిమానులు. ఏ విషయమైనా కచ్చితంగా తెలియాలంటే అధికారికంగా మేకర్స్ అప్డేట్స్ ఇచ్చేవరకు వేచి ఉండాల్సిందే!
