Mohammad Nabi: ప్రపంచ నంబర్ 1 వన్డే ఆల్ రౌండర్
Mohammad Nabi: మహ్మద్ నబీ ప్రపంచ నంబర్ 1 వన్డే ఆల్ రౌండర్ అయ్యాడు. ఐదేళ్ల పాటు షకీబ్ అల్ హసన్ (Shakeeb Al Hassan) పేరిట ఉన్న రికార్డును కొల్లగొట్టాడు. అంతర్జాతీయ క్రికెట్ కౌన్సిల్(ICC) బుధవారం ఆటగాళ్ల తాజా వన్డే ర్యాంకింగ్స్‌ను విడుదల చేసింది. ఈ జాబితాలో ఆప్గానిస్థాన్‌ ఆటగాడు మహ్మద్ నబీ సరికొత్త రికార్డు సృష్టించాడు. ఈ క్రమంలో సుమారు 1,739 రోజుల పాటు మొదటి స్థానంలో ఉన్న షకీబ్ అల్ హసన్ రికార్డును నబీ చిత్తు చేశాడు. దీంతో ప్రస్తుతం వన్డే ప్రపంచ నంబర్ 1 ఆల్‌రౌండర్‌గా మహ్మద్ నబీ ఘనతను సాధించాడు. ఈ విభాగంలో భారత ఆటగాడు రవీంద్ర జడేజా 10వ స్థానంలో కొనసాగుతున్నాడు.
అయితే షకీబ్ దాదాపు ఐదేళ్లపాటు అగ్రస్థానంలో ఉన్నాడు. గాయం కారణంగా షకీబ్ వన్డేలకు దూరంగా ఉండటం.. ఈ మధ్యలో నబీ సత్తా చాటడంతో వీరిద్దరి ర్యాంక్‌లు తారుమారయ్యాయి. షకీబ్ 310 రేటింగ్ పాయింట్లతో ఇప్పుడు రెండో స్థానానికి పడిపోయాడు. అదే సమయంలో 39 ఏళ్ల నబీ 314 పాయింట్లతో అగ్రస్థానానికి చేరుకున్నాడు. శ్రీలంకతో జరిగిన మూడు మ్యాచ్‌ల ODI సిరీస్‌లో ఆప్గానిస్తాన్ ప్రారంభ మ్యాచ్‌లో 136 పరుగులు చేసిన తర్వాత నబీ నంబర్ 1 స్థానానికి చేరుకున్నాడు. అదే పోటీలో అతను ఒక వికెట్ కూడా తీసుకున్నాడు.
ALSO READ: T20 World Cup: అందుకే రోహిత్ శ‌ర్మ‌ను ఎంపిక‌చేసారా?
ఈ క్రమంలో 39 సంవత్సరాల 1 నెల వయస్సులో నబీ ICC ODI ఆల్ రౌండర్ల పట్టికలో అగ్రస్థానంలో నిలిచిన అతి పెద్ద ఆటగాడిగా కూడా నిలిచాడు. ఈ నేపథ్యంలో 38 ఏళ్ల 8 నెలల తిలకరత్నే దిల్షాన్ రికార్డును కూడా బద్దలు కొట్టాడు.
ఇక భారత ఆటగాడు జస్ప్రీత్ బుమ్రా (ICC ODI ర్యాంకింగ్) టెస్టు బౌలర్ల జాబితాలో అగ్రస్థానంలో కొనసాగుతున్నాడు. ఇంగ్లండ్‌తో గురువారం ప్రారంభం కానున్న మూడో టెస్టులో పునరాగమనం చేసిన భారత ఆటగాడు రవీంద్ర జడేజా.. టెస్టు ఆల్‌రౌండర్ల ర్యాంకింగ్స్‌లో ముందున్నాడు. మరోవైపు దక్షిణాఫ్రికా స్పిన్నర్ కేశవ్ మహరాజ్ వన్డే బౌలర్ల పట్టికలో అగ్రస్థానంలో కొనసాగుతుండగా, శ్రీలంక వనిందు హసరంగ (14 స్థానాలు ఎగబాకి 26వ ర్యాంక్‌లో) ఉన్నాడు. దిల్షాన్ మధుశంక నాలుగు స్థానాలు ఎగబాకి 33వ ర్యాంక్‌కి చేరుకున్నాడు.
ఇక టెస్ట్‌ ఆల్‌రౌండర్ల ర్యాంకింగ్స్‌ విషయానికొస్తే.. జడేజా, అశ్విన్‌, అక్షర్‌ 1, 2, 5 స్థానాల్లో కొనసాగుతున్నారు. టీ20 బ్యాటర్ల ర్యాంకింగ్స్‌ విషయానికొస్తే.. భారత ఆటగాడు సూర్యకుమార్‌ యాదవ్‌ టాప్‌లో కొనసాగుతుండగా.. యశస్వి జైస్వాల్‌ ఆరో ప్లేస్‌లో నిలిచాడు. టీ20 బౌలర్ల ర్యాంకింగ్స్‌ లో ఆదిల్‌ రషీద్‌ టాప్‌లో కొనసాగుతుండగా.. భారత బౌలర్లు అక్షర్‌ పటేల్‌, రవి భిష్ణోయ్‌ ఐదు, ఆరు స్థానాల్లో నిలిచారు. టెస్ట్‌ ర్యాంకింగ్స్‌ లో భారత ఆటగాళ్లు విరాట్‌ ఏడులో, పంత్‌, రోహిత్ శర్మ 12, 13 స్థానాల్లో నిలిచారు.
వన్డే బ్యాటర్ల ర్యాంకింగ్స్‌ విషయానికొస్తే.. ఈ విభాగం టాప్‌-10లో ఎలాంటి మార్పులు జరగలేదు. ఇటీవల ఆఫ్ఘనిస్తాన్‌తో జరిగిన తొలి వన్డేలో డబుల్‌ సెంచరీతో చెలరేగిన లంక ఆటగాడు పథుమ్‌ నిస్సంక 10 స్థానాలు మెరుగుపర్చుకుని 18వ స్థానానికి చేరగా.. మూడో వన్డేలో 97 పరుగులతో అజేయంగా నిలిచిన నిస్సంక సహచరుడు అసలంక 5 స్థానాలు ఎగబాకి 15వ స్థానానికి చేరుకున్నాడు.
