మరో సైంటిస్ట్ బయోపిక్లో మాధవన్!
తొంభైల్లో ప్రేమకథలతో కుర్రకారును ఉర్రూతలూగించి లవర్ బాయ్ ఇమేజ్ను సొంతం చేసుకున్న హీరో మాధవన్. దక్షిణాదిన పలు సినిమాలతో అలరించిన మాధవన్ ప్రస్తుతం నటనకు ప్రాధాన్యం ఉన్న సినిమాలను చేస్తూ ఈతరానికి ఆదర్శంగా నిలుస్తున్నారు. ఈ క్రమంలోనే ఇటీవల రాకెట్రీ – నంబి ఎఫెక్ట్‌ అనే సినిమాతో దేశప్రజలకు తెలియని ఎన్నో నిజాలను వెలుగులోకి తెచ్చారు. ప్రముఖ ఇస్రో శాస్త్రవేత్త నంబినారాయణన్‌ జీవిత కథ ఆధారంగా రూపొందిన ఈ సినిమాలో నంబినారాయణన్‌ పాత్రలో మాధవన్ నటించడంతోపాటు తానే దర్శకత్వం వహించారు. ప్రస్తుతం మరో శాస్త్రవేత్త బయోపిక్తో ప్రేక్షకుల ముందుకు రానున్నారు.
గత ఏడాది రిలీజ్ అయిన ఈ చిత్రం సూపర్ హిట్టుగా నిలిచింది. 25 కోట్లతో తెరకెక్కిన ఈ సినిమా బాక్స్ ఆఫీస్ వద్ద 50 కోట్ల పైగా క‌లెక్ట్ చేసింది. ఇక ఈ సినిమా ఇంతటి విజయం సాధించడంతో ఇప్పుడు మరో బయోపిక్ తో ఆడియన్స్ ముందుకు వచ్చేందుకు మాధవన్ సిద్దమవుతున్నారు. మరో తమిళ ప్రఖ్యాత శాస్త్రవేత్త జీడీ నాయుడు బయోపిక్ లో మాధవన్ నటించబోతున్నారు. ఈ సైంటిస్ట్ ఇండియాస్ ఫస్ట్ ఎలక్ట్రిక్ మోటార్ ని కనిపెట్టారు. ఈ సినిమాని అనౌన్స్ చేస్తూ ఫస్ట్ లుక్ పోస్టర్ ని కూడా రిలీజ్ చేశారు.
ఇక ఈ సినిమాని మీడియా వ‌న్ గ్లోబల్‌ ఎంటర్‌టైన్‌మెంట్‌ నిర్మించబోతోంది. ప్రస్తుతం ఈ మూవీ ప్రీ ప్రొడక్షన్ వర్క్స్ జరుగుతున్నాయి. మరి ఈ బయోపిక్ ని కూడా మాధవన్ స్వీయ దర్శకత్వంలో తెరకెక్కిస్తున్నాడా? అన్నది తెలియజేయలేదు. త్వరలోనే ఈ మూవీ టైటిల్ మరియు నటీనటులు, టెక్నీషియన్స్ గురించి వెల్లడించనున్నారు. అలాగే దీనితో పాటు మాధవన్ మరో బయోపిక్ లో కూడా నటిస్తున్నట్లు తెలుస్తుంది. ప్రఖ్యాతి లాయర్ సి శంకరన్ నాయ‌ర్ బయోపిక్ లో నటిస్తున్నట్లు సమాచారం. మరి మాధవన్ బయోపిక్ల పరంపర ప్రేక్షకులను ఎంతగా మెప్పిస్తుందో చూడాలి.
