వెన్నెల కిషోర్ హోస్ట్గా ‘అలా మొదలైంది’!
ఈతరం కమెడియన్లలో తనకంటూ ప్రత్యేక ఇమేజ్ క్రియేట్ చేసుకున్న నటుడు వెన్నెల కిషోర్. తన కామెడీ టైమింగ్, డైలాగ్ డెలివరీ, ఎక్సప్రెషన్స్తో తక్కువ సమయంలోనే ప్రేక్షకులను కడుపుబ్బా నవ్వించగల కమెడియన్గా గుర్తింపు తెచ్చుకున్నారు కిషోర్. సినిమాలపై మక్కువతో సాఫ్ట్వేర్ ఉద్యోగాన్ని వదులుకున్న కిషోష్ తన మొదటి సినిమానే ఇంటి పేరుగా మార్చుకుని నటనపై తనకున్న మమకారాన్ని చాటుకున్నారు. ఇక, ఇన్నాళ్లూ వెండితెరపై నవ్వులు పూయించిన కిషోర్ ఇప్పుడు బుల్లితెరపైనా నవ్వించేందుకు వచ్చేస్తున్నారు. ఈటీవీలో ప్రారంభం కానున్న సరికొత్త టాక్ షో ‘అలా మొదలైంది’ కార్యక్రమానికి యాంకర్గా వ్యవహరించనున్నారు కిషోర్. అలా మొదలైంది షోను ప్ర‌ముఖ టాలీవుడ్ ప్రొడ‌క్ష‌న్ హౌజ్ పీపుల్ మీడియా ఫ్యాక్ట‌రీ నిర్మిస్తోంది. త్వ‌ర‌లోనే అలా మొదలైంది షో ఈటీవీలో టెలికాస్ట్ కానున్న‌ట్లు పీపుల్స్ మీడియా ఫ్యాక్ట‌రీ ప్ర‌క‌టించింది.
సినిమా, స్పోర్ట్స్ సెల‌బ్రిటీల జ‌ర్నీ ఎలా ఆరంభ‌మైందో ఈ షో ద్వారా వెన్నెల కిషోర్ ప్రేక్ష‌కుల‌కు పరిచయం చేయ‌బోతున్న‌ట్లు స‌మాచారం. ఈ షోలో పలువురు టాలీవుడ్ యంగ్ హీరోల‌తో పాటుసెల‌బ్రిటీలు పాలు పంచుకోనున్న‌ట్లు స‌మాచారం. ఈ కార్యక్రమం మొదటి ఎపిసోడ్కి టాలీవుడ్ యంగ్ హీరో నిఖిల్, ఆయన సతీమణి డాక్టర్ పల్లవి అతిథులుగా వచ్చి తమ ప్రేమ, పెళ్లి, కెరీర్కి సంబంధించిన పలు విషయాలు పంచుకనునారు. ఈ ఎపిసోడ్కి సంబంధించిన ప్రోమో ఇటీవలే విడుదలై ప్రేక్షకులను బాగా ఆకట్టుకుంటోంది. లాక్డౌన్ సమయంలో అతికొద్దిమంది బంధువులు, స్నేహితుల మధ్య పెళ్లి చేసుకున్న విషయం తెలిసిందే. ఇక, ఈ షోలో నిఖిల్ తన భార్య పల్లవిని మొదటిసారి ఎక్కడ కలుసుకున్నదీ, వారి పరిచయం ఎలా జరిగింది, అది క్రమంగా ప్రేమ, పెళ్లివైపు ఎలా అడుగులేసిందీ పంచుకున్నారు. అంతేకాదు.. ఆ ప్రయాణంలో వారికి ఎదురైన సమస్యలు, ఇబ్బందులను కూడా పంచుకున్నారు. ఇక వారిద్దరినీ వెన్నెల కిషోర్ అడిగిన ప్రశ్నలు, రాబట్టిన సమాధానాలు ఆధ్యంతం కార్యక్రమంపై ఆసక్తిని రేకెత్తిస్తున్నాయి.
కొన్ని సంవత్సరాలుగా ఈటీవీలో ప్రతి మంగళవారం ప్రసారమయ్యే ఆలీతో సరదాగా కార్యక్రమం ఇటీవలే ముగిసిన సంగతి తెలిసిందే. ఆ కార్యక్రమానికి బదులుగా అలా మొదలైంది షోని ప్రారంభించింది యాజమాన్యం. ఇక ఈ వారం నుంచీ ఈ ప్రత్యేక కార్యక్రమం ద్వారా పలువురు సెలబ్రిటీలు తమ విషయాలను పంచుకోనున్నారన్నమాట. వెండితెరతోపాటు వారం వారం తన చణుకులతో కిషోర్ బుల్లితెర ప్రేక్షకులనూ అలరించనున్నారు.
