Samantha: గుడి కట్టిస్తున్న వీరాభిమాని!
Bapatla: సినిమా హీరోహీరోయిన్లంటే చాలా ఇష్టపడతారు చాలామంది. కొందరు అభిమానులైతే వాళ్ల అభిమాన హీరో, హీరోయిన్ల సినిమాలు విడుదలైనప్పుడు కటౌట్లు పెట్టడమే కాకుండా పలు పూజలు, వ్రతాలు కూడా చేస్తుంటారు. ఇక, హీరోయిన్ల విషయంలో హద్దులు లేని అభిమానాన్ని ప్రదర్శిస్తూ ఉంటారు. కొందరు అభిమానానికి హీరోయిన్లు ఆశ్చర్యానికి గురవుతూ ఉంటారు. తమ అభిమాన తారల కోసం అభిమానులు గుడి కడతారనే విషయం తెలిసిందే.
ఇప్పటికే పలువురు అభిమానులు వాళ్ల అభిమాన తారల కోసం గుడి కట్టారు. తాజాగా, స్టార్ హీరోయిన్ సమంత(Samantha) కోసం ఆమె అభిమాని ఒకరు గుడి కడుతున్నారు. ప్రస్తుతం ఆ వార్త సోషల్ మీడియా(Social Media)లో వైరల్ అవుతోంది. అంతేకాదు, ఇప్పటికే విగ్రహాన్ని కూడా తయారు చేయించాడు ఆ వీరాభిమాని.
సీనియర్ హీరోయిన్ ఖుష్బూ(Kushboo), నయనతార(Nayanatara), హన్సిక, నిధి అగర్వాల్, నమిత(Namitha)కు వాళ్ల వాళ్ల అభిమానులు గుడి కట్టారు. ఇప్పుడు ఆ హీరోయిన్ల జాబితాలోకి సామ్ చేరింది. ఆంధ్రప్రదేశ్ లోని బాపట్ల నివాసి అయిన సందీప్ సమంతకు వీరాభిమాని. ఆమె మయోసైటిస్ బారిన పడినప్పుడు సామ్ కోలుకోవాలని తిరుపతి, చెన్నై, నాగ పట్నంలో మొక్కుబడి యాత్ర చేశాడు.
ఇప్పుడు ఏకంగా సమంతకు గుడి కడుతున్నాడు. బాపట్లలోని ఆలపాడు సందీప్ స్వస్థలం. ఆలపాడులోని తమ సొంత ఇంట్లో సామ్ కోసం అతను గుడి కడుతున్నాడు. ప్రస్తుతం గుడి నిర్మాణ పనులు వేగంగా జరుగుతున్నాయి. ఏప్రిల్ 28న సమంత పుట్టినరోజు. ఆరోజు లోపు ఈ గుడి నిర్మాణ పనులు పూర్తవుతాయట. అదే రోజున గుడి ఓపెనింగ్ ఉంటుందని సమాచారం. ఇలా తెలుగు రాష్ట్రాల్లో గుడి కట్టించుకున్న తొలి హీరోయిన్ గా సమంత నిలిచింది.
