Drishyam: కొరియన్లో ఇండియన్ సినిమా రీమేక్!
Hyderabad: కొరియన్ సినిమాలు(Korean movies) ప్రపంచ వ్యాప్తంగా చాలా పాపులర్. కొరియన్ థ్రిల్లర్, లవ్ జోనర్ సినిమాలను ఎక్కువగా ప్రేక్షకులు ఇష్టపడుతున్నారు. ఓటీటీ(OTT) వచ్చినప్పటినుంచి మనదేశంలోనూ కొరియన్ సినిమాల హవా పెరిగింది. తెలుగులోనూ కొన్ని కొరియన్ సినిమాలను రీమేక్ చేశారు. తెలుగులో రీమేక్ అయిన ఓ బేబీ(Oh Baby), శాకిని డాకిని(Shakini Dakhini) వంటి పలు సినిమాలు కొరియన్ సినిమాలే.
మనం కొరియన్ సినిమాలు చూసి సంబరపడిపోయి మన భాషల్లోకి రీమేక్ చేస్తుంటే, ఇప్పుడు కొరియన్స్ మన సినిమాను రీమేక్ చేయబోతున్నారు. మలయాళంలో జీతూ జోసెఫ్ దర్శకత్వంలో మోహన్ లాల్, మీనా జంటగా తెరకెక్కిన సస్పెన్స్ క్రైం థ్రిల్లర్ సినిమా దృశ్యం(Drishyam). ఈ సినిమా మలయాళంలో సూపర్ హిట్ అయి అనంతరం తమిళ్, కన్నడ, తెలుగు, హిందీ భాషల్లో కూడా రీమేక్ అయింది. తెలుగులో వెంకటేష్(Venkatesh), మీనా(Meena) జంటగా ఈ సినిమా తెరకెక్కింది. రీమేక్ అయిన అన్ని భాషల్లోనూ ఈ సినిమా భారీ విజయం సాధించింది. అనంతరం దీనికి సీక్వెల్ గా వచ్చిన దృశ్యం 2(Drishyam 2) కూడా అన్ని భాషల్లో రీమేక్ అయి మంచి విజయం సాధించింది. దృశ్యం 3(Drishyam 3) కూడా ఉంటుందని డైరెక్టర్ ప్రకటించారు.
ఇప్పుడు దృశ్యం సినిమా కొరియన్ లో రీమేక్ కాబోతుంది. బాలీవుడ్ నిర్మాణ సంస్థ పనోరమా స్టూడియోస్, కొరియన్ నిర్మాణ సంస్థ ఆంథాలజీ స్టూడియోస్ కలిసి కొరియన్ లో దృశ్యం సినిమాను రీమేక్ చేయబోతున్నారు. అధికారికంగా ఇదే కొరియన్ లో రీమేక్ అయ్యే మొదటి ఇండియన్ సినిమా. మరి థ్రిల్లర్స్ సినిమాలు ఎక్కువగా చూసే కొరియన్స్ కి ఈ దృశ్యం సినిమా ఏ రేంజ్ లో మెప్పిస్తుందో చూడాలి. ఈ సినిమా రీమేక్ ని అధికారికంగా కేన్స్ ఫిలిం ఫెస్టివల్ లో కొరియన్, ఇండియన్ నిర్మాణ సంస్థలు కలిసి ప్రకటించాయి.
