Ghajini2: అమీర్​ ఖాన్​ ప్లాన్​ వర్కౌట్​ అయ్యేనా?

Hyderabad: కోలీవుడ్​ స్టార్​ డైరెక్టర్​ మురుగదాస్(Murugadoss) దర్శకత్వంలో సూర్య(Suriya) హీరోగా రూపొందిన సినిమా గజిని(Ghajini). 2008లో విడుదలైన ఈ సినిమా అప్పట్లో సంచలనం సృష్టించింది. భారీ కలెక్షన్లు రాబట్టి బాక్సాఫీస్​ రికార్డుల్ని తిరగరాసింది. తమిళంలో తెరకెక్కిన ఈ సినిమా తెలుగులోకి డబ్​ అయి భారీ విజయం అందుకుంది. కాగా, సౌత్​లో ఘన విజయం సాధించిన ఈ సినిమాని అమీర్​ ఖాన్(Aamir Khan)​ హీరోగా హిందీలో రీమేక్​ చేసిన విషయం తెలిసిందే. ఒరిజినల్ వెర్షన్ కు దర్శకత్వం వహించిన మురుగదాస్ హిందీలోనూ ఈ సినిమాను తెరకెక్కించి బాలీవుడ్​(Bollywood)లోనూ సూపర్​ హిట్​ అందుకున్నారు.
బాలీవుడ్​లోనూ రికార్డు బ్రేకింగ్ కలెక్షన్స్ ను దక్కించుకున్న గజిని సినిమాను గీతా ఆర్ట్స్(Geetha Arts)​ బ్యానర్​పై ప్రముఖ టాలీవుడ్​ నిర్మాత అల్లు అరవింద్(Allu Aravind) నిర్మించారు. ఆ సినిమా తో అల్లు అరవింద్ భారీ మొత్తంలో లాభాలను దక్కించుకున్నారు. అమీర్ ఖాన్, అల్లు అరవింద్ కెరీర్లో మైల్​స్టోన్​గా నిలిచిన సినిమా గజిని. అందుకే వీరిద్దరికీ ఈ సినిమా పై ప్రత్యేక అభిమానం.

ఇక, తాజాగా గజిని సినిమా సీక్వెల్ తెరకెక్కించేందుకు ప్లాన్​ చేస్తున్నట్లు తెలుస్తోంది. అయితే మురుగదాస్​ సీక్వెల్​పై ఆసక్తిగా లేకపోవడంతో స్వయంగా అమీర్ ఖాన్ దర్శకత్వ బాధ్యతలు తీసుకుని గజిని సినిమా సీక్వెల్ చేయాలనే ఉద్దేశ్యంతో ఉన్నట్లు సమాచారం. ఈ మధ్య కాలంలో అమీర్ ఖాన్ నటించిన ఏ ఒక్క సినిమా కూడా బాక్సాఫీస్ వద్ద సందడి చేయలేక పోయింది. లాల్​సింగ్​ చద్దా డిజాస్టర్​ తర్వాత కాస్త సైలెంట్​ అయిన అమీర్​ గజినీ సీక్వెల్​తో సక్సెస్​ బాట పట్టాలని ఆలోచిస్తున్నారు. అందుకే దక్షిణాదిన గజిని సీక్వెల్ ఉంటుందో లేదో తెలీదు గానీ హిందీలో మాత్రం గజిని 2(Ghajini2) ఉండే అవకాశాలు ఎక్కువగా కనిపిస్తున్నాయి.