‘ఆ పాటతో నా కల నెరవేరింది’

బాలీవుడ్​ స్టార్​ హీరో సల్మాన్​ ఖాన్ నటిస్తున్న​ ‘కిసీ కా భాయ్ కిసీ కి జాన్’మూవీ నుంచి ఇటీవల విడుదలైన ‘ఏంటమ్మా’సాంగ్ రికార్డ్ వ్యూస్‌తో దూసుకెళ్తోన్న సంగతి తెలిసిందే. మొదటిసారి సల్మాన్​ నేరుగా హిందీతోపాటు తెలుగులోనూ ఈ చిత్రాన్ని తెరకెక్కిస్తున్నారు. ఇక ఈ చిత్రంలో సల్మాన్ ఖాన్, విక్టరీ వెంకటేష్ ప్రధాన పాత్రల్లో నటిస్తుండగా, పూజా హెగ్డే హీరోయిన్​గా కనిపించనుంది. విడుదలకు సిద్ధమైన ఈ మూవీ నుంచి విడుదలైన బతుకమ్మ పాట తెలుగు ప్రేక్షకులనూ ఆకట్టుకుంది. ఈ నేపథ్యంలో తాజాగా ‘ఏంటమ్మా’ అనే మాస్ సాంగ్ రిలీజ్ చేశారు మేకర్స్. ఇందులో సల్మాన్, వెంకీతో పాటు గ్లోబల్ స్టార్ రామ్ చరణ్ కనిపించడం విశేషం. ఈ ముగ్గురూ కలిసి లుంగీ గెటప్స్‌లో వేసిన మాస్ స్టెప్స్ అభిమానులను ఉర్రూతలూగిస్తున్నాయి. తాజాగా మేకర్స్ విడుదల చేసిన మేకింగ్​ వీడియోలో సల్మాన్‌తో కలిసి డాన్స్ చేయడంపై పలు విషయాలు పంచుకున్నారు మెగా పవర్​స్టార్ రామ్​ చరణ్​.

ఇక ఈ పాట విడుదలైన రెండు రోజుల్లోనే 43 మిలియన్‌కు పైగా వ్యూస్‌తో ఫుల్ క్రేజ్ సంపాదించింది. ఈ సందర్భంగా పాట క్రేజ్​ మరింత పెంచేందుకు మేకర్స్​ ఓ వీడియో విడుదల చేశారు. ఈ మేకింగ్​ వీడియోలో రామ్​ చరణ్​ ఈ పాటలో కనిపించడంపై ఆసక్తికర వ్యాఖ్యలు చేశారు. ‘ఈ సినిమాలోని ‘ఏంటమ్మా’ సాంగ్‌లో గెస్ట్ అప్పియరెన్స్‌‌ చేయడం అద్భుతంగా అనిపించింది. మొత్తానికి ఈ ఎక్స్‌పీరియన్స్ ద్వారా నా చిన్నప్పటి కల నిజమైంది. సిల్వర్ స్క్రీన్‌పై చూసినపుడు ప్రేక్షకులు ఈ పాటను బాగా ఎంజాయ్ చేస్తారు. ఈ పాట చేస్తున్నప్పుడు కూడా చాలా ఎంజాయ్ చేశాను’ అంటూ తన సంతోషాన్ని పంచుకున్నారు చెర్రీ.

పాయల్ దేవ్ కంపోజ్ చేసిన ‘ఏంటమ్మా’ సాంగ్‌కు షబ్బీర్ అహ్మద్ సాహిత్యం అందించగా.. విశాల్ దద్దానీ, పాయల్ దేవ్, రఫ్తార్ పాడారు. టాలీవుడ్​కి చెందని జానీ మాస్టర్ ఈ పాటకి కొరియోగ్రఫీ అందించడం ప్రత్యేకం. ‘కిసీ కా భాయ్ కిసీ కి జాన్’ చిత్రం ఈద్ సందర్భంగా ఏప్రిల్ 21న ప్రేక్షకుల ముందుకు రానుంది. ఇక, మెగా పవర్​ స్టార్​ రామ్ చరణ్ ప్రస్తుతం కోలీవుడ్​ స్టార్​ డైరెక్టర్​ శంకర్​తో ఓ సినిమా చేస్తున్న సంగతి తెలిసిందే. తాజాగా చెర్రీ బర్త్ డే సందర్భంగా ఈ సినిమా టైటిల్​ని ప్రకటించారు. ‘గేమ్ చేంజర్’గా భారీ బడ్జెట్‌తో ప్రముఖ నిర్మాత దిల్ రాజు నిర్మిస్తున్న ఈ చిత్రంలో కియారా అడ్వానీ హీరోయిన్​గా నటిస్తోంది. అంజలి, శ్రీకాంత్, సునిల్ కీలక పాత్రలు పోషిస్తున్నారు. థమన్ మ్యూజిక్ అందిస్తున్న ఈ సినిమా వచ్చే ఏడాది వేసవి కానుకగా విడుదలయ్యే అవకాశం ఉంది.