‘ఛత్రపతి’ హిందీ టీజర్.. సేమ్ టు సేమ్ దింపేశారుగా!
ప్రముఖ నిర్మాత బెల్లంకొండ సురేష్ వారసుడిగా సినీ పరిశ్రమలో హీరోగా ఎంట్రీ ఇచ్చారు బెల్లంకొండ సాయి శ్రీనివాస్. అల్లుడు శీనుగా తెలుగు ప్రేక్షకులను అలరించిన శ్రీనివాస్ తర్వాత చేసిన సినిమాలతో మాత్రం మెప్పించలేకపోయారు. కొంతకాలంగా కథల ఎంపికపై జాగ్రత్తలు తీసుకుంటున్న శ్రీనివాస్ చివరగా రాక్షసుడు సినిమాతో మంచి విజయం అందుకున్నారు. అనుపమ పరమేశ్వరన్ హీరోయిన్గా నటించిన ఈ క్రైమ్ థ్రిల్లర్లో శ్రీనివాస్ నటనకు మంచి మార్కులే పడ్డాయి. కాగా, ప్రస్తుతం శ్రీనివాస్ నటిస్తున్న సినిమా ఛత్రపతి హిందీ రీమేక్. దర్శకధీరుడు రాజమౌళి, యంగ్ రెబల్ స్టార్ ప్రభాస్ కాంబినేషన్లో వచ్చిన ఛత్రపతి సినిమాని వి.వి.వినాయక్ దర్శకత్వంలో శ్రీనివాస్ హీరోగా హిందీలో రీమేక్ చేస్తున్నారు. తాజాగా ఈ సినిమా టీజర్ని విడుదల చేశారు. నేచురల్ స్టార్ నాని నటించిన దసరా సినిమా మార్చి 30న ప్రపంచవ్యాప్తంగా విడుదలైన సంగతి తెలిసిందే. కాగా, ఈ సినిమా విరామ సమయంలో ఛత్రపతి టీజర్ని ప్లే చేసి అభిమానులను సర్ప్రైజ్ చేసింది చిత్రబృందం.
తాజాగా విడుదల చేసిన టీజర్ని చూస్తుంటే చాలావరకు ఒరిజినల్ సినిమానే ఫాలో అయినట్లు తెలుస్తోంది. ఛత్రపతి హిందీ రీమేక్లో బెల్లంకొండ శ్రీనివాస్ లీడ్ రోల్ లో నటిస్తున్నారు. 18 ఏళ్ల కిందట ప్రభాస్ హీరోగా వచ్చిన ఛత్రపతి సినిమా బాక్సాఫీస్ రికార్డులను తిరగరాసిన సంగతి తెలిసిందే. ఎస్.ఎస్. రాజమౌళి, ప్రభాస్ కాంబినేషన్ లో వచ్చిన తొలి సినిమా ఇది. ప్రభాస్ను స్టార్ హీరోగా మార్చిన సినిమా అని చెప్పవచ్చు. ఇదే మూవీని మన తెలుగు డైరెక్టర్, తెలుగు హీరో హిందీలో రీమేక్ చేస్తుండటం విశేషం. ఛత్రపతి పేరుతోనే వస్తున్న ఈ సినిమా టీజర్ ను గురువారం (మార్చి 30) రిలీజ్ చేశారు. ఇందులో బెల్లంకొండ శ్రీనివాస్ యాక్షన్తో ఇరగదీశాడు. మే 12న ఈ సినిమా ప్రేక్షకుల ముందుకు రానుంది. ధవల్ జయంతిలాల్, అక్షయ్ జయంతిలాల్ పెన్ స్టూడియోస్ బ్యానర్ కింద మూవీని నిర్మిస్తున్నారు. ప్రస్తుతం ఈ సినిమా పోస్ట్ ప్రొడక్షన్ పనులు జరుపుకుంటోంది.
అయితే, డైరెక్ట్ హిందీ సినిమా చేయడానికి ముందే బాలీవుడ్ ప్రేక్షకులకు దగ్గరయ్యారు బెల్లంకొండ శ్రీనివాస్. ‘జయ జానకి నాయక’ సినిమాను హిందీలో డబ్ చేసి విడుదల చేశారు. యూట్యూబ్‌లో విడుదలైన ఈ సినిమాను హిందీ ప్రేక్షకులు ఇరగబడి చూస్తున్నారు. ఈ సినిమా యూట్యూబ్‌లో అత్యధిక వ్యూస్‌తో ప్రపంచ రికార్డు నెలకొల్పింది. బెల్లంకొండ శ్రీనివాస్, రకుల్ ప్రీత్ సింగ్, ప్రగ్యా జైస్వాల్ హీరోహీరోయిన్లుగా మాస్ దర్శకుడు బోయపాటి శ్రీనివాస్ దర్శకత్వంలో రూపొందిన ‘జయ జానకి నాయక’ 2017 ఆగస్టులో విడుదలైంది. ఈ సినిమా విజయం సాధించడంతో నాలుగేళ్ల క్రితం పెన్ మూవీస్ సంస్థ హిందీలోకి అనువదించి యూట్యూబ్‌లో విడుదల చేసింది. ఈ యాక్షన్ మూవీని హిందీ ప్రేక్షకులు విపరీతంగా ఆదరించారు. తెలుగులో కూడా రానంత స్పందన హిందీలో రావడం విశేషం. దీంతో ఈ సినిమా యూట్యూబ్ వ్యూస్ పరంగా ప్రపంచ రికార్డు నెలకొల్పంది. ఏకంగా 709 మిలియన్ వ్యూస్‌తో ప్రపంచంలో యూట్యూబ్‌లో అత్యధికంగా చూసిన వీడియోగా రికార్డుకెక్కింది. అంతేకాదు శ్రీనివాస్ సినిమాలైన ‘సీత’, ‘కవచం’, ‘సాక్ష్యం’, ‘స్పీడున్నోడు’ వంటి సినిమాల హిందీ అనువాదాలకూ యూబ్యూట్‌లో వందల మిలియన్లలో వ్యూస్ వస్తున్నాయి. ఇప్పుడు ‘ఛత్రపతి’ సినిమాతో నేరుగా హిందీ ప్రేక్షకుల ముందుకు వెళ్లనున్న బెల్లంకొండ శ్రీనివాస్‌కు ఈ క్రేజ్ వస్తుందేమో చూడాలి మరి!
